Shillong, Nohprah, 22: Ka shnong Kharang, kaba hap hapoh ka Mawkynrew Community and Rural Development Block ha ka sien kaba ar kan sa pynlong bïang ïa ka jingïakob ñïah kali bulbering na ka bynta ka kynhun jong ki shynrang bad ka kynhun jong ki kynthei.
Ha ka jingïakren bad ki lad pathai khubor, u General Secretary jong ka Kharang Sports and Socïal Welfare Club (KSSWC) Bah Badonnam Kharbihthai u la ïathuh ba ïa kane ka jingïakob nïah kali bulbering yn sa pynlong ha ka 20 tarik, Kyllangkot, 2024.
Ka khusnam na ka bynta ki shynrang kan long T. 30 hajar ïa ka kynhun lahduh, T. 20 hajar ïa ka kynhun kaba wan baar bad T. 10 hajar ïa ka kynhun kaba wan balai.
Katba ka khusnam na ka bynta ki kynthei ka long, T. 10 hajar ïa kiba iohrah ïa ka nam lahduh, T. 5 hajar ïa kiba wan baar bad T. 3 hajar ïa ka kynhun kaba wan balai.
Kan sa don ruh ka khusnam ba kyrpang ban ai sha ka kali bulbering kaba la shna itynnat ha kane ka jingïakob.
