ïaknieh tiket u Saleng bad ka Deborah na Garo, thikna ka Congress ban dang jop u Ma Pala na Shillong

Shillong, Nohprah 17 : U MLA ba la lai sien lai wat jongka Gambegre Constituency u Saleng A Sangma bad ka MLA ba rim jongka Williamnagar ka Deborah Marak ki long ki arngut ki kyrtong kiba la paw bha ban ïaknieh tiket na ka Congress na ka bynta ka election MP Lok Sabha na ka Tura Parliamentary Constituency.
U Nongïalam ka Congress Legislature Party (CLP) u bah Ronnie V Lyngdoh u la ïathuh ba ki don haduh saw ne san ngut kiba la wan pan tiket na ka Congress na ri lum Garo hynrei haduh mynta hi ka party kam pat khot aplikeshon satia.
U la ïathuh “U Saleng u dei uwei uba la pynpaw ba u kwah ban ïakhun ïa kane ka election MP bad uba kwah ruh ban ïoh tiket na ka Congress. Kumjuh ruh ka Deborah Marak ruh ka dei kawei kaba la pynpaw ba ka kwah ban ïa khun ïa katei ka election MP na Tura Parliamentary Constituency bad kaba kwah ruh ban ïoh ïa ka tiket Congress. Hynrei haduh mynta ngim pat khot aplikeshon bad dei tad hadien ba la bthah ïa ngi ban khot aplikeshon noh ba ngin sa khot bad shwa ban rai ïa ka tiket ruh ngin hap ban bishar bniah mano ba lah ban ïoh ïa ka jingjop na Tura ïa u ne ka yn ai ïa ka tiket”.
Ha kaba ïadei bad ka Agatha kaba dei ka MP jongka NPP mynta na Tura Parliamentary Constituency u bah Ronnie u la ong ka shong ha ki paidbah ban bishar bad rai la ka la ai ne em ka jingshakri kaba pynhun ïa ki paidbah ka ri lum Garo. Ym dei ka party ban rai hynrei ki dei ki paidbah ki ban rai haduh katno ka la ai ka jingshakri ïa ki.
Ha kaba iadei pat bad ka Shillong Parliamentary Constituency u bah Ronnie u la pynpaw ba ka Congress ka dang thikna beit ban jop biang ïa ka Shillong da u President ka MPCC bad uba dei ruh u MP mynta u ma Vincent H Pala.
Nalor kane u la ïathuh ba ka Congress ka la pynkhreh bha mynta wat ia ka election MDC sha ki ar tylli ki Autonomous District Council (ADC) ka Khasi Autonomous District Council (KHADC) bad ka Jaintia Hills Autonomous District Council (JHADC).
Baroh lai tylli ki election kata MP bad kine ki election MDC ki long kiba kongsan bha na ka bynta ka Congress namar ka hap ba ïakhun ban jop bun bad na kata ka daw tang shu ïoh jingbthah na ka AICC yn pynïaid noh shaid shaid ïa ka kam ban jied ïa ki kyrtong.
U la ong “ Ka party kan bud ryntih ïa ki rukom pynïaid jongka party bad kan jied ruh ia ki kyrtong kiba la thikna ban jop naduh ka MP haduh ka MDC election”.
Halor ka rai jongka NPP ban pynïeng da ki kynthei na baroh ar tylli ki Parliamentary constituency u bah Ronnie u la ong “ Ka bhah ba kyrpang 33 % na ka bynta ki kynthei ka dei kaba la wanrah da ka Congress ban pynthikna ba ki kynthei ki ïoh ban mihkhmat ïa ki paidbah ha ka kam saiñ pyrthei. Nga kmen haduh katta katta ba kiwei ki party ki bud ïa ki dienjat jongka Congress ban ailad ïa ki kynthei ban mihkhmat ha ka kam saiñ pyrthei bad ka NPP ka la long kawei na kita ki party”.
Lah ban pynkynmaw ba nalor ka Agatha na Tura ka NPP ka la rai ban pynïakhun ïa ka Dr Ampareen Lyngdoh na kane ka Shillong Parliamentary Constituency.
Halor ka jingkylli hato ka jingïakhun jongka Dr Ampareen kan ktah ne em ïa u ma Pala, u bah Ronnie u la ong “ La kan knieh ne ym knieh ïa ka vote jongka Congress kata ka shong ha ka rai jongu paidbah”.