Sdang ka 29th State Karate Championship 2023

Shillong, Nohprah 16 : Ka All Meghalaya Karate-Do Association [AMKA] hynne ka sngi Thohdieng ka la ïoh ban jam shakhmat ban sdang ïa ka lympung kaba ka tip da ka 29th State Karate Championship 2023 ba la pynlong hapoh Indoor Hall, J.N. Stadium kaba ha Polo.
Kane ka rynsan pyni jingtbit ha ka Karate kaba ar sngi la pynlong ha ryngkat ka jingkyrshan na ka Directorate of Sports & Youth Affairs, jong ka Sorkar Jylla. Ki la don haduh 372 ngut ki nongïalehkai, naduh kiba dang 10 snem haduh kiba la heh, kiba na ki District bapher bapher ki la wan ban shimbynta ha kane ka jingïakop.
Ha kane ka sngi plie ïa kane ka jingïakop la wan Kongsan da u Bah Ransom Sutnga-Co-Chairman of the Meghalaya Industrial Development Corporation Ltd ha ryngkat u President jong ka Mawkhar Sports Club.
Haba ai jingkren ha kane ka sngi, u Bah Sutnga u la ong, “Ka AMKA ka dei ka synjuk kaba ju shakri ban pynlong ïa kine ki championship ban kyntiew ïa ka sap jong ki khynnah. Naduh snem 1981, ka AMKA ka la sei haduh 200 ngut ki nongïalehkai kiba la khur takma ha ki rynsan ïakop hapoh ka Ri bad 20 ngut kiba la ïoh ban khur takma shabar Ri.” U la bynrap da kaba kyrmen ba kane ka synjuk kan dang lah ban bteng ïa ka kam bad ruh ban sei shuh shuh ïa ki nongïalehkai na ka Jylla ha ki snem ban wan.
Nalor kane, u Bah Sutnga, u ba la pynbna ban sdang ïa kane ka Championship, u la ai sngewbha ruh da ka cheque bad aiti sha u President ka AMKA, u Bah Hunlang Lytan bad u General Secretary Ksan Warjri ban kyrshan bad pyntyllun ïa ka Association ha ki kam ba ka trei.
Ha kane ka sngi la wan Synbud Kongsan da u Working President jong ka Meghalaya State Olympic Association- u Bah John F Kharshiing. U la ai khublei ïa ka AMKA kaba pynlong ïa kane ka Championship bad pynpaw ba ka Karate ka dei kawei na ki jingïalehkai kiba paw ha ka Jylla.
Shuh shuh, u Bah John F Kharshiing u la ai khublei ruh ïa ki kmie ki kpa kiba la ai ka jingkyrshan ïa la ki khun ban pynshlur ïa ki ban shimbynta ha ki jingïalehkai bad ruh ban ïaid lyngba ka Meghalaya Sports Policy ban long ka jingmyntoi ïa la ki khun. U la ai buit ruh ïa ki klob lem bad ïa ki Shlem ai-jinghikai (Accademies) ban pan jingïarap lyngba ka YESS Meghalaya Scheme.
Kane ka jingïakop la pynlong shi bnai shuwa ka 5th Meghalaya Games, ka ban sa long ha Tura, bad ki nongïalehkai karate ki la ïoh ban shim ïa ka kabu ban sei madan ïa la ka jong ka sap lyngba kane. Nalor kane, u Bah John Kharshiing u la bynrap ba ka Meghalaya Games dalade ka dei kum ka jingpynkhreh na bynta ka National Games, kano ka Jylla ka ban sa ïohpdiang pynlong.
Ka jingpyni rukom lehkai ha kane ka championship ki kynthup ïa ka kumite (sparring) bad ka kata (demonstration of form), ki kyrdan ki long na bynta marwei bad ruh shi kynhun kiba la phiah bad bynta ïa ki katkum ka snem bad jingkhia. Kumban shu pynkynmaw, ka Sports Authority of India, Shillong, ka la jop bun ki takma ha ka lympung ba ladep, ka AMKA ka la ïohrah na ki Kynthei.
Baroh ki don haduh 10 tylli ki District kiba la wan shimbynta bad kine ki kynthup East Jaintia Hills District, West Jaintia Hills District, East Khasi Hills District, West Khasi Hills District, Eastern West Khasi Hills District, South West Khasi Hills District, Ri Bhoi District, West Garo Hills District, North Garo Hills District, South Garo Hills District.