Tohkit ka Crime Scene Unit bad K-9 Unit ïa ka jaka ba shah pynïap u nonghikai ha Mynniar
![](https://mawphor.com/wp-content/uploads/2022/05/mawphor-1.jpg)
Shillong, Nohprah, 12: Ki Pulit jong ka West Khasi Hills District ha ka sngi Baar ki la synran ïa ka kynhun ki Pulit ka Crime Scene Unit bad ïa ka kynhun K-9 Unit Dog Squad kiba la hiar sha Mynniar ka jaka ba la jia ka jingshah shoh bad shah lute jong ki ar ngut ki nonghikai ka Rangsapara Secondary School kaba la jia ha ka janmiet jong ka Lah Sngi u Blei.
Hadien ba ki Pulit ki la pyndep nadong shadong ha kaba ïadei bad ka jingtohkit ha kane ka jaka ki la rah noh ïa ka met ba dang sah jong u T.R Sangma u nonghikai uba la khlad noh hashen ha ka jingshah thombor ha ki runar bad ban leh ïa ka Post Mortem.
Ki Pulit ki la lap ruh ïa ka thuk thuk ba la pyndonkam da kine ki arngut ki nonghikai kaba la kyllon harud surok.
Haduh mynta ki Pulit ki dang pynlong ïa ka jingtohkit kaba bniah bha halor kane ka jingjia bad ban thwet tyngeh ïa ki runar kiba donkti ha ka kam lute bad ka kam pynïap briew.
Kine ki arngut ki nonghikai, ki dei kiba la tip kyrteng kum u S. Chetri uba la 49 snem ka rta bad u T.R. Sangma uba la 48 snem ka rta, katba ki dang wan na Nongstoiñ da ka thuk thuk da ka jingthmu ban leit sha Rangsapara ha ka Lah Sngi u Blei mynta ka taiew hynrei ynda ki la poi ha kawei ka jaka ba la tip kum ka Mynniar ki runar kiba ym shym la lah satia ban ithuh ïa ka durkhmat ki la tied bad bom dusmon ïa kine ki arngut kat haduh ba uwei u la khlad noh hashen katba uwei pat u la mynsaw jur.