Shillong, Nohprah, 12: Ka Organising Committee jong ka KSU Mawlai Circle ha ka sngi Baar ka la khynra ïa ki mynder kiba trei bylla ha ki shnong bapher bapher kiba don hapoh ka jyllli jong ka shnong Mawlai.
Ha kane ka jingkhynra, ha ka thaiñ Mawiong, Nongkwar bad Iewrynghep ka seng la lap ïa shibun ki mynder kiba ban trei ïa ki kam ñiad rong, tah tiles bad kiwei ki kam trei misteri ki bym biang bad bym don kino kino ki kot ki sla khamtam ka Work Permit.
Na ka liang jong ka seng hadien ba ka la lap ïa ki mynder bym don ki kot ki sla ba biang ka la pynher krad bad pynphai sha ka jaka kaba ki wan bad ka la maham tyngeh ba kim bit ban dang wan trei wan ktah hapoh ka shnong Mawlai bad ha Ri khasi hi baroh kawei, ong u kyrwoh ba la phah da u Asst. Secretary ka KSU Mawlai Circle u samla Macdonald Jitem.
“Ka KSU Mawlai circle ka kyntu ïa baroh ki trai ïing, ki Kontraktor bad ïa baroh ki para ri ba ki dei ban kiar na ka jingaikam aijam ïa ki mynder namarba kane kan nang pynkharoi shuh shuh ïa ki mynder ri hangne ha ri jong ngi bad kan buh jingma ïa ka ri bad ka jaidbynriew hi baroh kawei, namarba lada ki mynder ki wan sha ka ri jong ngi lada kim ïoh ki kam ki jam ba kin im bad kamai ja kpoh kin ym lah ban shong bad ban sah hangne ha ka ri jong ngi,” ong u kyrwoh.
“Kyntang ïawai ka seng ka ïawer ïa baroh ki para ri ban sangeh noh ban aikam ïa ki briew kiba nabar bad ban sdang ai kam para Khasi kum shi bynta ba ngin ïaleh pyrshah bad ïada ïa ka jingsdang ban wan buhai shnong ki mynder ri hapoh ka ri baieid jong ngi,” ong shuh shuh u kyrwoh.
