Shillong, Jymmang 15 : Ar tylli ki kali ki la julor jur bad don bok ki briew kiba shong hapoh jongki ki ïoh ban phet bad lait im na ka jingshah ban ha ka jingtwa khyndew bad maw ha surok Rngaiñ hajan Pynursla. Kane ka jingjia ka la jia hynnin ka miet haka por kumba 9 baje ei ei katba kine ki kali ki dang kiew na ki thaiñ Pynursla sha ki thaiñ Laitlyngkot.
Kine ki kali kiba shah ban ha ka khyndew bad julor jur ki kynthup ïa kawei ka Alto tourist taxi bad kawei ka maruti van. La ïathuh haba ki la poi ha katei ka jaka ki la ïohi ba ka la don ka jingtwa khyndew bad kumta ki la pyrshang ban kynran noh shadien hynrei ha kum katei ka por la nang jur ka jingtwa bad ki briew kiba shong hapoh ki la ïoh ban kynthi bad phet krad bad lait im na katei ka jingshah ban ha ka khyndew. Ha ka por mynstep haba la pynkhuid ïa ka jingtwa da ka JCB la lap ba ka maruti Alto ka la julor jur namar ka la dam syndah katba ka maruti van ruh kala julor jur hi tangba ym dei eh kat ka jingjulor ka Alto.
