Nongpoh, Jymmang 15: Tang hadien ba ka KSU dang ha kine ki khyndiat sngi kala leit ban khynra ïa kawei ka karkhana ha Umiam MIDC halor ka jingpyntrei ïaki bar jylla ba khlem kot khlem sla bad pynphai biang ïaki sha ki shnong jong ki, ka KSU haka step jong ka 13 tarik kala ioh ban kem biang kumba 90 ngut ki bar jylla kiba thmu ban rung beaiñ sha ka jylla khlem ki kot ki sla kiba biang.
Ka seng haka jinglam khmat u Samla Baiaishah Kharshanlor General Secretary ka KSU Nongpoh Circle, samla Macdonald Kharkamni Vice President ryngkat bad ki dkhot kila leit pynap shrip haka por 5 baje mynstep bad ioh ban bat 2 tylli ki bos bad kawei kali Eco kaba kit kumba 90 ngut ki mynder kiba wan ban rung sha ka jylla khlem ki kot ki sla kiba biang.
Haka jingtohkit ki dkhot ka seng la ioh jingtip ba kine ki mynder ki dei kiba thmu ban leit trei sha ki jaka ba pher ba pher kum sha Shillong, Laitkor, Balat bad kiwei kiwei khlem ki kot ki sla ha kaba ki la pynkheiñ ruh ia ka Aiñ Inter-state Migrants Workmen (Regulations of Employment and Conditions of Service) Act 2011 bad naka liang ka seng ha kane kajuh hi ka step ka la pynphai noh ia kitei ki bar jylla sha ka jaka ba ki wan.
Ka seng lyngba kane ka kyrwoh ka maham jur ïa baroh ki ba mlien ban kdup bad ailad ïa ki mynder ri ban wanrung beain khlem ki kot ki sla kiba biang ba kim dei ban khot lane phah rung beaiñ sha ka jylla khlem ki kot ki sla ba biang bad lada lap naka liang ka seng kan sa shim da ki sienjam kiba tyngeh.
