Saw na ki san tylli ki jylla kiba la don ka elekshon jingjied sorkar thymmai bad kiba lah dep ñiew ïa ki jingjied-jingpynpaw jong ki (voting) kata ka Chattisgarh, Madhya Pradesh, Rajasthan, Telangana ki la pyni ïa kano ka seng ki jied ban synshar mynta san snem. Ka jingjied ha Mizoram yn dang ñiew lashai namar ki Mizo ki pyrshah jur ïa ka ban ñiew ïa ki jingjied (vote) ha ka Sngi U Trai (Sunday). Yn ñiew ïa ki lashai ka sngi. Na ki jylla kiba ladep ñiew mynta ka sngi lai tylli ki leit sha ka BJP bad kita kin long ka Rajasthan, Madhya Pradesh bad Chattisgarh. Ka Telangana kaba don sha ka bynta ba shathie jong ka ri ka la jied ïa ka seng Congress. Shisien bishar te imat ki bynta ba shathie jong ka ri India kim pdiang ïa ka seng Bharatiya Janata Party (BJP) kaba dei ka seng kaba thmu ban pynkhie im bad pynieng rasong ïa ka niam Hindu kumba ngi la ïohi ïa ki jingjia ha kine ki snem naduh u snem 2014 ba long Myntri Rangbahduh u Narendra Modi uba dei ruh u dkhot ka Rashtriya Swayamsevak Sangh (RSS) kaba long kum ka seng niam Hindu.
Lada ka jingjied ki paidbah ka ïaid ha kane ka dur te imat ha u snem 2024, bnai Jymmang ruh haba yn sa don ka jingjied na ka bynta ka dorbah bah Parliament, ka BJP kan sa lah ban jop biang sa shisien bad ban synshar biang ïa ka ri India. Na ki 7 tylli ki jylla jong ka Shatei Lammihngi ngi don baroh tang 26 ngut ki dkhot (MP) ha ka dorbah bah Parliament. Na kine ki 26 ngut ka Assam ka don 14 ngut bad kiwei pat ki jylla ki don tang mar arngut ki MP. Te lada kane ka jylla ka jied ne kam jied ïa ki nongmihkhmat kiba na ka BJP, kam ym don jingktah ei ei ruh. Dei ki jylla kiba bun MP kum ka Uttar Pradesh, Madhya Pradesh, Chattisgarh, Bihar, Rajasthan, Uttarakhand bad kumta ter ter ki ban sa rai ïa ka Sorkar ka ban synshar ïa ka ri India.
Lada long ha kane ka rukom te imat yn ym don satia ka seng lane ki seng kiba ieng pyrshah ïa ka BJP ha kane ka ri. Ka seng Congress ka la sngewthuh ba kam lah shuh ban ieng tang marwei ban pyrshah ïa ka BJP bad namar kata ka daw ka la ïateh lok bad kumba 28 tylli kiwei pat ki seng saiñhima bad ïa kata ka kynhun la ai kyrteng ka Indian National Developmental Inclusive Alliance (I.N.D.I.A). Mynta u snem u nongïalam ba kham pawnam ka seng Congress u Rahul Gandhi ryngkat bad kiwei pat ki seng kiba pyrshah ïa ka BJP ki la ïaid kjat kylleng sawdong ka ri bad khamtam eh sha ki jylla kiba shathie jong ak ri India. Ïa kane ka jingïaid la khot ka Bharat Jodo Yatra lane ka jingïaid kjat ban teh song ïa ka ri India baroh kawei. Ka jingthmu ka long ban ïaleh pyrshah ïa ka seng BJP – ka seng kaba ki kynnoh ba ka la pynpait pynpra ïa ka ri baroh kawei da kaba wanrah ïa ka jingsngew ïapher niam bad ka jingpynkhie rasong ïa ka niam Hindu (Hindutva) bad ka jingbym khien snep ïa kiwei pat ki seng rit paid kum ka niam ki Muslim lane ki Kristan.
Dei na kane ka Bharat Jodo Yatra imat ba ka seng Congress ka la lah ban jop ïa ka jingjied Sorkar ha ka jylla Karnataka bad mynta ha ka jylla Telangana. Hynrei imat kane kam trei kam satia sha ki bynta ba shaneng jong ka ri India. Ka jingkylli mynta ka long hato ka seng Congress ka dang lah mo ban khyllie khlieh sha kine ki lum Shatei Lammihngi jong ngi? Kumba long mynta te imat ha ka jylla Assam ruh ka la sar lut ka BJP bad ka seng Congress ka i kum ban duh mynsiem noh. Wat ha ka jylla Meghalaya ruh mynta don ki don tang 5 ngut ki MLA ka seng Congress. Te ynda la ïakhun ban ïoh long MP ha u bnai Jymmang 2024 hato ka seng Congress kan dang lah hi mo ban pynjop biang ïa u Bah Vincent Pala uba la jop la lai sien kynthih naduh u snem 2009. Ha kane ka kynti u Bah Vincent Pala un ïaleh pyrshah ïa ka Kong Ampareen Lyngdoh ka ban sa ieng na ka seng NPP.
Ha ki lum Garo lei lei te ka seng Congress ka don tang uwei u MLA bad ka Agatha Sangma jong ka seng NPP kan dang ieng biang sa shisien nangto na ka Tura konstituwensi. Ka seng NPP ka khlaiñ bha ha ki lum Garo te khlem pep ka Agatha ka lah ban jop biang sa shisien. Naduh ba u iehnoh u Dr. Mukul Sangma ïa ka seng Congress ryngkat bad 12 ngut ki MLA bad leit ïasnoh bad ka Trinamool Congress, ka seng ka la tlot shaba palat. U Bah Vincent Pala kum u nongïalam ka seng Congress um shym la lah ban pynkhie im biang ïa ka. Lada ka long kumne kumba long mynta te imat ka seng Congress la la duh jait syndon ha ka jylla Meghalaya.
Ha kiwei ki jylla kum ka Tripura, Manipur, Nagaland, Mizoram bad Arunachal Pradesh ruh ka seng Congress kam i lah khyllie khlieh shuh. Nalor kata ki seng riewlum baroh ha kine ki jylla kim lah satia ban ïa tylli ban ïaleh pyrshah ïa ki seng radbah ka ri (national parties). Lada long kumba long mynta te ka lawei ka i shong syier bha namar ym don ba lah ban ieng ïaleh pyrshah lem na ka bynta ki rit paid na la liang ka niam bad ka jinglong jaitbynriew ruh.
Bunsien ki nongïakhun elekshon ki pyrkhat beit tang kumno ban jop. Ban ïaleh elekshon khlem ka pisa te ka long kaba eh haduh katta katta. Ngi ïohi kumno ba ki kyrtong ki bym don pisa ki liem lut ha kane ka elekshon jong ka jylla ha u bnai Lber 2023. Lehse ka por ka la poi ba ngin pyrkhat kham jngai halor ka jinglong jingman jong ka saiñ hima ha kane ka jylla bad ha ka ri hi baroh kawei. Hynrei mano kein ban ïalam ïa ngi ha kane ka lynti ïaid kaba dap da ki diengpyngkiang kiba bun?
