Shillong, Nohprah 04: Kum shi bynta ban plie lad ïa ki nongrep ban ïoh die ïa la ki mar rep, u Myntri Rangbah ka Jylla u Conrad K Sangma ula pyntip ba ka Sorkar kan sa pynbun ïa ki Regulated Markets bad ki Farmers Market ha kylleng ka Jylla.
ïa kane u Myntri Rangbah ula pyntip haba kren sha ki lad pathai khubor hadien ba wai ka 3rd Farmers Parliament kaba la pynlong kum shi bynta ban rakhe ïa ka sngi kyrpang ki nongrep hapoh ka Jylla.
U Conrad ula pyntip ruh ba ka Sorkar ka pynshlur ïa ki nongrep ban thaw da ki kynhun ban pynïaid ïa ki ïew katkum ka jingsngew bit ki nongrep na ka bynta ban kyntiew ïa ka ïoh ka kot da ka ba ïa die ïa thied.
“Ka Sorkar kan pynbun ïa ki Farmers Market bad ïa ki Regulated Market bad ka Sorkar kan ïaleh ban nym mushlia ha kum kine ki ïew bad kan ailad ïa ki nongrep ban pynïaid hi ïa kum kine ki ïew katkum ka jingsngew bit jong ki” la ong u Conrad.
U Conrad ula ong ba ka jingdon ki Farmers Market kan khanglad ïa kiwei ki riew shim kabu ban wan tuklar ha ka ïa die ïa thied ki nongrep ïa la ki mar bad kane kan long ka jingmyntoi ïa ki nongrep ka jylla.
Ula ïathuh ba ki don ki Farmers Market kiba la treikam bad ki don ki ban sdang treikam shen bad kine ki Farmers Market kin ai lad ïa ki nongrep, la ki kwah ban die ha kum kine ki ïew ne sha kiwei pat ki ïew ïa la ki mar ki mata.
Na ka liang ka Myntri ka tnat ka Rep ka Riang ka Kong Ampareen Lyngdoh kala ïathuh ba nalor ki Regulated Markets bad ki Farmers Market ka Sorkar jylla ka ïarap ruh ïa ki nongrep ban die ne shalan ïa ki mar rep sha kiwei pat ki Jylla ka Ri India bad sha bar Ri ruh kum juh.
Ka Kong Ampareen ka la ong “Ka tnat lyngba ki skhim bapher bapher ka ïarap ïa ki nongrep ban don ka jingïadei bad ki nongthied mar rep na kylleng ka Ri India bad na shabar Ri bad dang shen ka tnat kala ïarap ïa ki nongrep ban die ïa ki mar mata ha ka World Food Mart kaba la long ha Nongbah Delhi”.
