Shillong, Nohprah 04 : U Myntri Rangbah ka Jylla Conrad K Sangma u la ong ba kum ka jylla ki sngewkmen haduh katta katta ba u shynrai Lakadong ba pynmih na kane ka jylla u la ïoh la ka jong ka muhor ne Geographical Indication (GI tag).
Haba kren ha ka sngi Nyngkong, u Myntri Rangbah u la ong ba ka sorkar jylla ka pyrshang ban pynïoh ïa katei ka muhor na bynta baroh ki mar rep tynrai ba ka jylla ka mih la ka long naduh ki soh ki pai, ki jhur ki jhep bad kiwei kiwei.
“Ngi dap da ka jingkmen kaba khraw ba u shynrai Lakadong u la ïoh ïa ka GI tag kaba pynlong kyrpang ïa une u mar rep ba pynmih na kane ka thaiñ. Kane kan pynlong ïa une u mar rep ban heh dor bad kan pynsuk ruh wat ban pynïaid ïew.”
Nalorkata u ogn ruh ba kin pyrshang mynta ban pynïaid ïew wat ïa kiwei ki mar rep kiba mih na kane ka thain. Ïa kane ka muhor na bynta u shynrai Lakadong la ai da ka Registrar of Geographical Indications, GI Chennai.
Kumba long haduh mynta ka jylla ka la ïoh ïa u GI tag na bynta u sohñiamtra.
