Shillong, Nohprah 4 :Hadien ka jingïasoi soskular ïasuk ba dang shen hapdeng ka United National Liberation Front (UNLF), ka Sorkar Manipur bad ka Sorkar India ha ka 29 tarik Naiwieng, 2023 kumba 25 ngut ki nongïalam/ ki dkhot jong ka National Revolutionary Front Manipur (NRFM- ka kynhun kieng atiar Meitei) ba ïalam da u Major Boicha (Vice Chief jong ka Army Staff jong ka NRFM) ha ryngkat 25 tylli ki tiar ïaleh ki la ïasoh bad ka UNLF ha ka 2 tarik Nohprah, 2023.
Lyngba kane, bun ki dkhot jong ka kynhun ki la shim ïa ka sienjam ban kyntait ïa ka jingïaumsnam. Kane ka sienjam kan rah shakhmat ïa ki sienjam jong ka Sorkar India ban pynneh ïa ka shongsuk shongsaiñ ha Manipur.
Kum ban shu kdew, ïa ka NRFM (ba ju tip mynshuwa kum ka United Revolutionary Front) la seng ha ka 11 tarik Nailur, 2011 da ki dkhot jong lai tylli ki kynhun jong ka KCP, ka kynhun kieng atiar Meitei. Ki heh nongïalam jong ki, ki treikam na ki ktem ba don ha ka ri ba marjan bad ki don bynta ha ki kam ïaumsnam bad dawa pisa ha ki bynta bapher bapher jong ka them
Manipur. Kane ka sienjam kan pynshlur ïa kiwei ki kynhun kieng atiar Meitei ban ïasoh bad ka jingïasuk bad ba kin buddien ïa ki jingdawa jong ki ha ka rukom kaba ïahap bad ka synshar paidbah bad ruh ka kyntiew ïa ka jingthmu jong ka Sorkar u Modi ban don ka ‘Thain Shatei Lammihngi kaba lait na ki kam kieng atiar bad kaba ïoh ïa ka jingriewspah’.
