Shillong, Nohprah 4 : Ka Viksit Bharat Sankalp Yatra (VBSY) ka dang bteng ïa ka jingïaid lynti jong ka kaba ai mynsiem ha kylleng ka jylla Meghalaya ha kaba ki la don ki jingïadei kiba seisoh bad ki briew ha ryngkat ka jingai jingtip bad ka jingpynkupbor ïa ki briew lyngba ka jingai jingtip shaphang ki prokram bapher bapher kiba ïadei bad ka bha ka miat jong ka imlang sahlang bad ka roi ka par.
Ha nongbah Shillong, ka kali Urban IEC (Information, Education and Communication) Van ka la pynlong ar tylli ki prokram mynta ka sngi ha Don Bosco Square bad Khyndailad (Police Bazar). Ki nongshong shnong ha kine artylli ki jaka bad ki jaka ba ïajan bad kine ki la ïashim bynta shitrhem ha kane ka yatra. Hapoh ka IEC campaign, la pynlong ïa ki prokram ban ai ki jingshakri kum ki health checkup ba ïoh ei, ki lad ban ïoh ïa ki Aadhaar card bad ruh ban pynthymmai ïa ki card ba ki briew ki la don lypa. Ki briew ki la wan shakhmat ruh ban ïoh ïa ki connection LPG ba thymmai bad la ai ruh ïa ki Ayushman Bharat health card, la ai ruh ïa ki jingai ram hapoh ka skhim PM SVANidhi.
Kum shi bynta kane ka kam kaba pynlong ha kylleng ka ri, ka kali IEC ba kyrpang, lyngba ka multimedia ka la ai jingtip ïa ki briew shaphang ki prokram, ki skhim bad ki sienjam bapher
bapher jong ka Sorkar India ban kyntiew ïa ka jingim jong ki briew ha Meghalaya. Ha kane ka sngi, ki nongïashim bynta ki la bam smai Viksit Bharat Sankalp Yatra ruh ban pynurlong ïa ka India kaba la kiew shaphrang bad kaba lah ban pyndap ïa la ki jingdonkam shuwa u snem 2047. La sam ruh ïa ki certificate sha ki nongïoh jingmyntoi na ka PM SVANidhi.
Ka Viksit Bharat Sankalp Yatra, kaba la plié paidbah da u Myntri Rangbah Duh, u Narendra Modi ha ka 15 tarik u Naiwieng, 2023 ka thmu ban ai jingtip ïa ki briew ban pynurlong ia ka jingpynpoi pura ïa ki skhim kiba ïadei bad ka jingkhuid, ki jingshakri kiba ïadei bad ki kam pisa, ka bording, bad ka jingïoh ïa ki tyndong LPG, ki ïing sah na ka bynta kiba duna jingïoh, ka jingshngaiñ ha ka jingïoh bam, ka jingïoh ïa ka bam kaba tei met bad ki jingai jingsumar kiba lah ban shaniah. Ka Yatra ka thmu ban poi sha palat 2.55 lak tylli ki Gram Panchayat
bad palat 3,600 tylli ki bor pynïaid shnong ha ki jaka sor shuwa ka 25 tarik u Kyllalyngkot,2024 ha kaba ka jingseisoh kan don ha baroh ki distrik jong ka ri.
