Shillong, Nohprah 04 : U Myntri Rangbah ka Jylla, Conrad K Sangma ha ka sngi Nyngkong u la ai ka jingïaroh ïa ka party BJP kaba la jop donburom ha ki lai tylli ki jylla ha kane ka elekshon MLA kaba la pynbna ha kane ka sngi U Blei bad sngi Nyngkong jong ka taiew.
Ki jylla kiba ka BJP ka jop don burom ki kynthup ïa ka Madhya Pradesh namar ka jop haduh 163 ngut na ki 230 tylli ki constituency, katba ha Rajasthan na ki 199 seat ka jop haduh 115 ngut bad ha Chattisgarh pat na ki 90 tylli ki seat ka jop donburom haduh 54 ngut.
Haba phai pat sha Telangana ka Congress ka la ïoh ban knieh noh ïa ka bor synshar na ka BHRS katba ha Mizoram kaba niew vote ha ka sngi Nyngkong, ka ZPF ka la pynkyndit ïa ka MNF da kaba knieh noh ïa ka bor synshar na katei ka party.
“Kaba pynkyndit kadei eh ha Madhya Pradesh, nga ai khublei ïa u Shivraj Singh Chauhan uba wat hapdeng ki jingeh kiba bun u la lah ban jop ïa ki bad ryngkat ka kynhun ki la khur ïa ka jingjop kaba don burom,” ong u Conrad uba dei ruh u National President ka National People’s Party.
Ha kajuh ka por, u Conrad u la phah ruh ka jingkhublei sha u National President ka BJP, u JP Nadda halor katei ka jingjop ha ki lai tylli ki jylla kynthup ïa ka Rajasthan bad Chattisgarh.
