Shillong, Nohprah 04 : Ka Sorkar Jylla ka la rai ban pynpoi noh ïa ki optical fibre sha man ki Block ka Jylla ban pynkhlaiñ ïa ki lad pyniasoh lyngba ki kor internet.
Kane ka rai ka la long hadien ka jingïalang bishar bniah bad bud dien ïa ki kam bad ka Tnad Information Technology ba long mynta ka Lah Sngi U Blei.
Haba ïakren bad ki nongthoh khubor, u Myntri Rangbah ka Jylla Conrad K Sangma ula pyntip ba ka jingïakren kaba bniah kala don bad ka Tnad Telecom, ka Power Grid ha kaba la rai ba kin pynïaid noh shakhmat ha ka ban ring ne tan ïa ki optical line sha baroh ki Block.
“Ngi la dep buh ïa ka roadmap bad ha kane ka project kan sa sdang da ka kylla kylla. Ka Sorkar ka khmih lynti ba ka kam kan sdang la kumno kumno ha u bnai Lber 2024 bad khmih lynti ban pyndep ïa ka kam hapoh 12-15 bnai kata ha u bnai Jylliew ne Naitung 2025” ula ong.
“Ngi khmih lynti ba baroh ki Block ha ka Jylla bad ruh ki Sub Division kin ïoh noh ïa ki lad pyniasoh da ki optical fibre” ula bynrap.
Ka Sorkar kan pynthikna ba lada don kino kino ki jaka pule, ki hospital ne ki Ophis treikam kiba kwah ban shim connection, ki lah ban shim ha kano kano ka por ynda la pynpoi ïa u laiñ opticle fibre kat haba pynkut.
