Shillong, Naiwieng 28 : Kat kum ka khanasamari 2011 ki don 627 ngut ki briew kiba la dep pynkylla ïa ka jinglong shynrang bad kynthei jongki ne kita ki ‘Transgender’ ha ka jylla. Na kata ka daw ka sorkar jylla kam kwah ban shu ïehbeiñ ïa ki kumta bad ka la dep thaw ïa ka kynhun ka ban thaw ïa ka policy na ka bynta jongki ha kane ka jylla.
Kane ka long kat kum ka kaiphod ba la wanrah da ka Directorate of Social Welfare ha ka jingïalang bud dien ïa ki kam ki jam bad ka jingpyntreikam ïa ki skhim bapher bapher ne review meeting ba ar sngi kaba la long ha Convention Centre.
La pynpaw ruh ha ka kaiphod ba ka tnad Social Welfare ka dang pynkhreh ruh ban rah hakhmat ka sorkar ban plie noh ïa ka Head of Account na ka bynta ki Transgender.
La ïathuh ba ki don 21 tylli ki aplikeshon ba pan ïa ki Identity Card na kine 13 ngut ki la ïoh, 6 ngut dang bishar bniah bad 2 pat kiba dang sahteng bym pat biang ki kot ki sla.
Ha kane ka kaiphod la pynpaw ruh ba ka sorkar ka la dep thaw ïa ka State bad District Transgender Justice Board bad thung ïa ki ophisar ki ban pdiang ïa kino kino ki jingujor.
Ka la dep thung ruh ïa ki Standing Committee ha baroh ki District ban pynsted ka jingtohkit lada don kino kino ki jingujor ïa ka jingshah thombor jong kine ki briew.
Ha ka 23 tarik Kyllalyngkot 2018 ka kynhun myntri ka la wanrah ruh ka jingpynkylla ha ka Meghalaya Registration of Birth and Death Rule 1999 na ka bynta ban kynthup ïa ki transgender kum ki bynta ba lai nalor ki kynthei bad shynrang ha ka tarik kha ne iap jongki.
Kat kum ka Draft Electoral Roll ba la pynmih ha ka 27 tarik Risaw mynta u snem ki don tang 2 ngut ki transgender ki ban ïoh thep vote napdeng ki 21,86,151 ngut ki nongthep vote ka jylla.
Haba kylli halor kane na ka liang u Myntri ka tnad Social Welfare u bah Paul Lyngdoh u la ïathuh ba ka tnad ka dang lum jingtip bad pan ïa ki kot ki sla halor kane.
Nalor kata u la ong lehse ba jur ka jingpeit poh ne peit beiñ ïa kine ki transgender, lehse na kata ka daw ki don tang 2 ngut kiba pynrung kyrteng ha ka electoral rolls. Ka kamram jong ka tnad ka long ban pynsngewthuh ïa ki briew ba kim dei ban peit poh ne ibein ïa kine ki briew khnang ba kine ki briew kin ym don ka jingsngew ba kim ïa imlang bad ka imlang ka sahlang. Donkam ban pynshlur ïa ki ban ïamih bad ïa imlang kum kiwei ki para briew” ong u bah Paul.
Shuh shuh na ka liang ka Director jongka Social Welfare I Kong CD Lyngwa i la ïathuh ba ka tnad kan ïatrei lang bad ki consultant agency ba kin lum jingkheiñ biang ïa ka jingdon ki transgender hapoh ka jylla.
