Khliehriat Naiwieng, 28: Kumba paw ha ka video ba la saphriang ha ka Social Media, ha ka sngi Baar, ka la mih ka jingïakawang maw bad ka jingïasei wait hapdeng ki nongkhrong khajna jong ka Jaiñtia Hills Autonomous District Council (JHADC) bad ki nongñiah trok Punbaji kaba la jia ha surok Jowai Bypass.
Ka thymmei khubor ka ïathuh ba kane ka la jia na ka daw ba ki nongñiah trok ki la kyntait ban siew ïa pisa sha ki nongap khyrdop jong ka JHADC bad ki la pyrshang ban phet krad bad kumta ka la mih ka jingkawang maw ïa ki trok.
Kumba ka paw ruh ha ka video, ki nongñiah trok ruh ki la sei da ka wait (talwar) bad ki nongtrei ka JHADC ki la hap ban phet krad ban lait na ka jingmynsaw.
Ki nongñiah trok ki la mih na kali lem bad ki wait bad hadien shi por ki la rung biang shapoh ki kali bad phet noh na kane ka jaka bad dei ha kane ka por ba ki nongap khyrdop ka JHADC ki la kawang da ki maw ïa ki kali.
Ka khyrdop kaba don ha surok Jowai Bypass ka dei ka khyrdop khrong pisa jong ka JHADC kaba ju lum pisa na ki trok kiba rung sha rilum Jaiñtia bad ha ka khyrdop ki nongtrei jong ka JHADC ki ju peit bad bishar ruh ïa ki kot ki sla jong ki kali kiba kit jingkit.
