50 million dollar mang ka Sorkar ban tei bad pynbha ïa ki Anganwadi Centre ha ka jylla
Shillong, Naiwieng 28 : Ka Sorkar jylla ka la mang ban pynlut haduh 50 million dollar ban tei ïa 273 ki Anganwadi Centre ba thymmai ha ka jylla bad ruh ban kyntiew kyrdan bad pynbha ïa palat 2200 tylli ki Anganwadi Centre hapoh ka Jylla.
ïa kane la pyntip hadien ka jingïalang bud dien ïa ki kam bad skhim ba arsngi kynthih ba la pynïaid da u Myntri ka Tnad Social Welfare ka Jylla Bah Paul Lyngdoh kaba la kut mynta ka Sngi Ba Ar.
Kane ka jingïalang bud dien ïa ki kam ka long halor ka jingpyntreikam ïa ki skhim bapher bapher ka Sorkar Pdeng, kaba la long hadien san snem. Ka jingïakren ka la ïaid ruh halor ka jingdonkam ban thung ïa ki riewshemphang hapoh ka Tnad.
Haba ïakren bad ki nongthoh khubor, u Bah Paul ula ong ba kawei na ki jingduna ba khraw eh hapoh ka Tnad ka dei ka jingbym don ia ki briew kiba tbit ban pynkhreh ïa ki Detailed Project Report (DPR) bad ruh ban pynkhreh ïa ki Utilization Certificate ha ka por kaba biang.
“Namar kata, ngi sngew donkam ban thung ia ki briew kiba tbit ki riewshemphang kiba lah ban ïakren kam bad ki Ministry ha Delhi khnang ban lah ïoh kloi ïa ki skhim bapher bapher, kiba la sakut namar ka jingbym lah ban pyndep ïa ki jingdonkam ha ka por kaba dei” ula ong.
U Principal Secretary ka Social Welfare u Sampath Kumar ula ïathuh ba ka Tnad ka hap ai jubab sha ki san tylli ki tnad ka Sorkar pdeng ba kynthup ïa ka Ministry of Women and Child Development, Ministry of Social Justice, Ministry of Tribal Affairs, Ministry of Minority Affairs bad ki khep ki khep sha ka DoNER.
“Ngi don ïa ka Directorate kaba rit na kata ka daw, ka jingpynkhlaiñ ïa ka Directorate kan sa urlong noh. Ka Directorate kan sa ïoh noh ïa ki jingkyrshan jong ki briew ba tbit khnang ba kin lah bha ban ïakren kam bad ki tnad sorkar pdeng” ula ong.
U Kumar u pyntip ba ka Sorkar ka la rai ban shna bad kyntiew kyrdan ïa ki Anganwadi Centre-kiba mynta ki kdup ïa palat 6 lak ngut ki khynnah.
“Ngi la buh ïa ka mang tyngka ba 50 million dollar ban kyntiew kyrdan bad tei ïa kine ki Anganwadi Centre” ula ong haba bynrap “Kumba nga ong, ngi la dep ïasoi iaka soskular shim ram haba buh hakhmat ïa kine ki kam bad kane ka long lyngba ka ADB Project nalor ki song pisa ba ngi ïoh lyngba ka MGNREGS”.
U ïathuh ba ka Tnad ryngkat ka jingïatreilang bad ka C&RD ka la pynlong ïa ka jingjurip ïa baroh ki Anganwadi Centre hapoh ka Jylla bad haba pynshong nongrim ïa kane, la lap ba 273 tylli ki Centre ki dei ïa ka ban pynpra noh bad ban tei thymmai. Palat 2290 tylli ki centre ba donkam ba kyntiew kyrdan.
U pyntip ba la bthah ruh ïa ki Deputy Commissioner ba kin wanrah ia ki jingtyrwa ha ka ban tei ïa ki Aganwadi Centre ba thymmai ha palat 1500 tylli ki Shnong ki bym pat shah kynthup lang.