Jowai, Naiwieng, 23: Ka All Jaiñtia Muster Roll Workers & Labour Union (AJMRW&LU) CEC Jowai ka la pyntip ban kan don ka jingïakynduh lang jong ki nongtrei Muster Roll kiba trei ha ka tnad Sorkar jong ka PHE (RWS & Electrical) hapoh ka Jaiñtia Hills ka ban long ha ka 25 tarik mynta u bnai ha ka por 10:00 baje mynstep ha ïingdorbar ka Loomïongkjam, Jowai.
Ka General Secretary jong ka Seng ka Kong Hunbeitki Dkhar ka la pyntip ba kan don ka jingïamir jingmut lang halor ka jinglong shngaiñ ka rukom treikam jong ki, ka bainong kaba kin ïoh bad kiwei de ki jingmyntoi na ka bynta ka lawei jong ki kum ki nongtrei Muster Roll ha ka tnad PHE.
Ka seng ka kyrpad ïa baroh ki nongtrei bylla sngi (Muster Roll) ha ka tnad PHE ba kin poi khnang sha ka jingïalang khnang ban ïoh jingtip shibun ki jingmyntoi jong ki kum ki nongtrei. Ha kajuh ka por yn ïakren ïa ka bha ka miat ha ka rukom treikam, ka rta ban shong thait ban ïoh myntoi ki khun ki kti, ban pynkhlaiñ shuh shuh ïa ka jingtreilang bad ka sorkar nalor kiwei de.
