Tura, Jymmang 14: Ki ar sngi jong ka jingpynlong ïa ka District Level Inter School Athletics Meet ha Ballonggre Field kaba don hajan Tura kaba la wan ban ïashim bynta da ki khynnah skul na ki skul bapher bapher kala poi noh sha kaba kut ha ka sngi Thohdieng. Ïa kane ka Inter School Athletics Meet la ïoh ban pynlong biang hadien ar snem da ka District Sports Office, Tura kum shi bynta ka Khelo India 2022, Azadi Ka Amrit Mahotsav bad ruh ka jingdap 50 snem ka jingïoh la ka jong ka jylla ba pura.
Ïa kane ka jingïalehkai la plie pyrda da u Ram Singh uba dei u Deputy Commissioner ka West Garo Hills District katba u Jasper P Marak u Assitant Director ka Sports and Youth Affairs ba la shongthait noh u la wan ban pynhap pyrda ha ka 13 tarik Jymmang 2022.
Haba ai jingkren ha kane ka sngi pynhap pyrda u J P Marak u la ai khublei ïa ki nongjop ha ki jingïakob bapher bapher kynthup ïa ki nongïalehkai kiba khie samla kiba la wan ban ïashim bynta shitrhem. U la ong ba kam long kaba suk ban kiew shaphrang bad kyntu ïa ki nongjop ba kin dang ïa trei shitom ban rah nam bad burom ïa la ka jong ka skul bad wat ïalade ruh. Shuh shuh u la ai khublei ïa ka sorkar jylla kaba la weng noh ïa ki kyndon Covid-19 bad kaba la shah ban pynlong ïa kane ka lympung kaba long ka jingmyntoi na ka bynta ki khynnah skul. U la kyntu ruh ïa ki khynnah skul ba ki dei ban shim bynta ha ki jingïalehkai Track and Field bad ai mynsiem ruh ba kin nang ïai trei shitom ha ka lawei ïalehkai.
Na ka liang u Saljagring M Marak uba dei u District Sports Officer, Tura u la ïathuh ba la pynlong ïa kiba bun ki jingïalehkai ha ka track bad field ïa kaba la phiah ha ki kyrdan ïakhun ki bapher bapher kum ka kyrdan Under 14, 16, 18 ba kynthup shynrang bad kynthei. Ha kane ka lympung ka Monfort Secondary School, Dilnegre Bolchugre ka la long ka lahduh katba ka Monfort Centre for Education, Tura ka wan ba ar.
Ha kane ka sngi kut la donlang ruh u Senior Medical Officer, Tura Dr Roger Marak, ki nonghikai, ki kmie ki kpa, ki khynnah skul, official bad staff jong ka District Sports officer, Tura bad ki paidbah nong shong shnong.
