Shillong, Naiwieng, 17: Ka Ingbishar Meghalaya High Court ha ka sngi Thohdieng ka la pan ïa ka kaiphod ba dang sah pongding halor ki kam bymman pyrshah ïa ki MP ne ki MLA ha ka Jylla.
Ïa ka suo-moto cases ba ai kyrteng, “In-re: Designated Courts na ka bynta ki MP/MLA la rejistar katkum ka jingbthah jong ka Ingbishar Supreme Court ha ka 9 tarik, Naiwieng, 2023.
Ka hukum ba la pynmih da u Chief Justice (Acting) HS Thangkhiew ka la ong, “ha kaba ïadei bad ka jingbthah ha ka Sl. (iii), (iv) and (vi), la bthah ïa ki District and Session Judge jong ki district ba kin phah ïa ki kaiphod ha kaba ïadei bad ki case ba dang sahteng ha ki Ingkashakri ki jong ki. Shuh shuh, la ailad ïa ki Designated Court katkum ba la kdew haneng ha ka para 20 (iv) bad kumjuh ruh ha ka para (vi). Ka jingbthah ka kynthup ruh ha ka para (vii) bad yn sa bthah ïa ka Computer Section ban shimkhia ïa kane ka kam.”
Katkum ka jingbthah jong ka Ingbishar Supreme Court, ka Ingbishar High Court ka lah ban donkam ïa ki Principal District and Sessions Judge ban shim ïa ka jingkitkhlieh ha kaba bhah ïa ki sobjek cases sha kita ki iingkashari lane ki iingshari katkum ka jingidonkam. Ka Ingbishar High Court ka lah ban khot ïa u Principal District and Sessions Judge ban phah ïa ka kaiphod.
Ka Ingbishar Supreme Court ka la bthah ruh ïa ki Ingkashari ban buh shwa ha khmat, “(i) nyngkong eh ïa ka Criminal Cases pyrshah ïa ki MP & MLA kaba ka jingpynshitom ka long da ka jingïap ne ka jingshah set along shi rta, nangta ban (ii) ki case ba la pynshitom da kaba set along na ka bynta 5 snem ne palat ïa kata, bad ban shong bishar (iii) ïa kiwei kiwei pat ki case. Ki Ingkashari kim dei ban buh teng ïa ki case hynei lait noh tang lada don kano kino ki daw kiba shongnia.”
Ka la ong ruh, “U Principal District and Sessions Judge un pynthikna ban pynbiang ïa ki jingdon jong ki ingkashari bad khnang ban dup lah ban pyntreikam ïa ki teknoloji na ka bynta ban pynstet ïa ka jingtreikam.”
Ka Ingbishar Supreme Court ka la ong ba ki Special Bench kiba shong bishar ïa ki suo-motu case ki dei ban buh sngi lypa lada sngew donkam. Ka Ingbishar High Court ka lah ban pynmih kum ïa kita ki hukum bad/lane ki jingbthah katkum ka jingsngew donkam khnang ban pynstet ïa ka case. Ka Special Bench ka lah ruh ban khot wat ïa u Advocate General lane ïa u Public Prosecutor ban ïarap lang ïa ka Ingbishar.
“U Chief Justices u la lah ban buh sngi ïa ki case kiba la pynmih hukum ban pynsangeh ïa ka jingshong bishar ba ladep pynmih kham hashwa da ka Special Bench ban pynthikna ka jingpynmih ïa ka hukum, kynthup ruh ka hukum ba la pynsangeh ban pynthikna ba kan long noh mardor bad ban pynkut noh ïa ka jingbishar,” ka la ong.
Shuh shuh ka Ingbishar Supreme Court ka la bthah ruh ïa ki High Court ban thaw da ki Independent Tab ha ki website ka ban ai jingtip na ki district shaphang u snem ba la ujor, ka jingdon jong ki cases ba dang sahteng bad ki kaiphod. “Ngi la pynshai haba bishar ïa ki case, ka Special Bench ka lah ban pynmih ïa ka hukum lane ban ai ïa ka jingbthah lada donkam na ka bynta ban pynkut noh ïa ki case,” ka la bynrap.
