Tura, Naiwieng 15: Ka Garo Students’ Union (GSU) bad ka Federation of Khasi Jaintia and Garo People (FKJGP) ki la pynlong ïa ka jingkhynra bad ki la ïoh kurup ïa ki dawai dashin ki bym long shuh na ka ïew kaba don ha Rongara, South Garo Hills District.
U President ka FKJGP u Tengsu Marak, ula ong ba ka jingpynlong ïa katei ka jingkhynra ka dei hadien ba kila ïoh pdiang ïa ka jingujor na ki nongshong shnong.
Ha katei ka jingkhynra la shem ba ki nongdie dukan ha ka ïew Rongara ki la shah kynnoh ba ki la die da ki dawai bad kiwei kiwei ki mar, ki bym long shuh ne ki bym treikam shuh ne kiba la kut ka por.
U President ka GSU Rongara Circle ula pynpaw ka jingsngewkhia ïa katei ka rukom leh ym tang ha katei ka thaiñ hynrei ha kylleng ki bynta jong ka rilum Garo bad ula pynpaw ba ka long kaba donkam kyrkieh ban shim khia ïa kane ka mat kaba jia ha kylleng ki jaka bad ula kyntu ba dei ban shim khia mardor khnang ba kan ym buh ha ka jingma ïa ki nongthied.
Ha ka sngi Balang la thang noh ïa baroh kitei ki dawai kiba la sniew ne ki ba la kut ka por treikam.
