Nongstoiñ, Naiwieng 15: Ha ka thaiñ Nongtrai kaba hap ha Mawshynrut Civil Sub Division, la lap watla ki surok ki la poi la jan ha man la ki dong bad ki thaiñ, hynrei katba nang mih ki snem ki nang sniew kat haduh ba kim long shuh ban ïaid kali.
Kawei na ki surok ha katei ka thaiñ kaba la sniew sha ba palat ka dei ka surok na Mawdiang sha Langdongdai, kaba dei ka surok kaba la shna lyngba ka skhim shi spah sngi.
Ha kaba ïadei bad ka jingsniew jong ka surok u Bah Arful Mangsang Secretary ka Synjuk Rangbah Shnong Langdongdai Area (SRSLA) bad u Bah Kardening Rongrin, ki la ïathuh ba katei ka surok ka long kaba donkam haduh katta katta, namar katei ka thaiñ ka dei kaba bun bha ki mar rep kum u sying, u kwai, synsar, ki soh ki pai bad kiwei kiwei.
Ki la ong ruh ba ha ki snem ba la leit noh, ki paidbah na ki 14 tylli ki shnong kiba marjan, ki ju pynlong ïa ka jingmih paidbah ban maramot da kaba trei bor met. Hynrei kim lah satia ban pynbiang kat haduh ba ki kali kin lait suk ban ïaid. Ki la ïathuh ruh ba ha une u snem lei lei namar ka jingjur slap palat, ki longkmie kiba thmu ban leit kha khun lung ha Riangdo CHC ki hap ban ïaid da ka kjat haduh lai bad saw kynta haduh ban da poi ha ki jaka ba lait kali.
Ki la ong ba ka jingeh kaba kham hakhmat eh ka dei ïa kiba pang ba shitom namar ba hap ban pynkit da u briew haba ki mut ban leit phah sumar. La ong ba dei namar kitei ki jngeh ba ki paidbah na katei ka thaiñ, ki hap ban shaniah beit ha ki nongai dawai kynbat khlaw haba ki pang ki shitom bad wat ki longkmie kiba armet ruh ki hap ban shaniah ha ki dawai kynbat, namar ki shem jingeh ban leit sha Hospital namar ka jingbym don ïa ka surok kaba biang.
Kitei ki rangbah ki la dawa ïa ka sorkar khamtam eh na u MLA ba don burom ba un phai khmat lem sha katei ka thaiñ ban pynbha bad maramot ïa katei ka surok, khnang ba ki paidbah kin lait na ki jingeh ha ka leit ka wan.
