Ka Eucharist ka dei ka pdeng bad ka tyllong jong ka jingngeit Catholic: Apostolic Nuncio

Shillong, Naiwieng, 12: “Ka Eucharist ka dei ka pdeng bad ka tyllong jong ka jingngeit Catholic,” ong u Apostolic Nuncio ka India bad Nepal u Most Rev. Leopoldo Girelli haba ai ïa ka Apostolic Message sha ki lak ngut ki paidriewngeit kiba ïalum ha Lum Tyngkong, Laitumkhrah ha ka nohphai sngi jong ka Sngi u Blei kiba la ïashim bynta ha ka jingïaid Proseshon Eucharist kaba ju long shisien shisnem.
“Nga sngewkmen haduh katta katta ba nga la ïohlad ban ïashim bynta ha kane ka proseshon Eucharist jong ka Shillong Archdiocese ban ïasam bad phi ïa ka jingieid bad ka jingriewblei ha ka Eucharist Bakhuid. Ka jingmut jong ka proseshon Eucharist ka long ban mane, ban rwai, ban ïaroh bad ban ainguh ïa u Blei uba ieid ïa ngi haduh kaba kut bad Uba la ai ïalade ha ngi lyngba ïa ka Met bad ka Snam. Ka Eucharist ka dei ka jingaiei jong u Trai Jisu Khrist kaba da lade hi U la pynpaw ha ngi ïa ka jingieid ba khlempud jong U Blei ïa ngi ki briew,” la ong u Archbishop Girelli.
“Ka jingïaid proseshon ka pynkynmaw ruh ba ka dei ka jingïaid lynti jong ngi ha kane ka sla pyrthei bad U Jisu hi U la ïaid ryngkat lang bad ngi. U long U paralok, U long u nongïalam lynti, U long u Kpu uba pynkdang ha ka jingïaid lynti jong ngi sha ka jingim bymjukut,” u la bynrap.
“Kum ki Khristan ngi donkam ïa U Khrist ba Un don ha ka jingim jong ngi,” la kyntu u Archbishop Girelli ïa ki paid u Blei bad bynrap, “ka Balang ka ïoh jingim lyngba ka Eucharist. Ka Vatican Council ka pynbna ba ka Eucharist ka dei ka tyllong jong ka jingim Khristan.”
U Auxilliary Bishop jong ka Aizawl u Most Rev. Joachim Walder haba pharia ïa ka ktien jong u Blei ha ka ktien Phareng u la ong, “kumba u Blei u la ai ïa ka jingbam ban tei ïa ka met u buh ruh ïa ka Eucharist ba kan long ka jingbam ba kynja mynsiem ba uno uno uba thngan bad uba sliang un ïoh ïa ka jingim kaba pura lada u phai sha u Jisu ha ka Eucharist Bakhuid.”
U Bishop jong ka Jyllaniam Jowai u Most Rev. Ferdinand Dkhar uba la ai jingkren ha ka ktien Khasi u la sneng bad kraw ïa ki riewngeit da kaba pynkynmaw ba ka jingwan iuhkjat jong u Apostolic Nuncio uba long u nongmihkhmat jong u Pope Francis, ka jingïadon lang jong u Bishop Joachim Walder na Aizawl bad ki riewngeit na kylleng ka jylla bad wat na shabar ri ka pynpaw shai ba ka Balang Catholic ka long kawei bad ka phaikhmat sha u Jisu kum u nongsharai ba hakhlieh tam kum ka tynrai bad ka tyllong jong ka jingieid.
Ha ka jingknia ïa ka Mass Bakhuid ha ka por mynstep kaba la long ha Calvary la pynmynta da u Apostolic Nuncio Archbishop Leopoldo Girelli ryngkat ka jingïadon lang jong Archbishop ka Jylla Niam Bah Shillong u Most Rev. Victor Lyngdoh, u Bishop jong ka Jylla Niam Nongstoiñ u Most Rev. Willbert Marweiñ, u Bishop jong ka Jylla Niam Jowai u Most Rev. Ferdinand Dkhar, u Auxiliary Bishop jong ka Aizawl u Most Rev. Joachim Walder, ki spah ngut ki Lyngdoh Sohblei bad ki lak ngut ki paidriewngeit na ki lai tylli ki Diocese, u Symbud Myntri Rangbah ka Jylla Bah Prestone Tynsong, ki Myntri Sorkar ba kynthup ïa ka Dr. Ampareen Lyngdoh bad u Bah AL Hek, u MP ka Shillong Bah Vincent Pala, ki MLA, ki MDC, ka Deputy Commissioner jong ka East Khasi Hills Kong RM Kurbah bad kiwei kiwei.
Ka Balang ha kane ka sngi, ka la pynkup burom ïa ki lai ngut ki Lyngdoh Sad kiba la ïashim bynta lang ha ka jingknia ïa ka Mass Bakhuid bad na ka liang jong ka ka Editorial Board Ka Ïing Khristan (EBIK) ka la pynkup burom da ka khusnam ‘Ka Ïing Khristan Literary Award’ na bynta u snem 2023 ïa u Bah Apol Mawñiuh hadien ba kynhun ki nongbishar ki la ibit ba ka jingthoh jong u halor ka phang ‘Ka jingieid shi kurim ka thymmei jong ka ïing ka sem basuk’ ka long ka jingthoh ba kynsai tam jong u snem 2023.
La pynkut ïa ka Proseshon Eucharist da ka jingkyrkhu jong u Apostolic Nuncio ïa ki paid u Blei da ka Eucharist Bakhuid shwa ban pynkut ïa ka jingmane ïa ka Sakramen Bakhuidtam ka Duwan.