Shillong, Jymmang 12: Ka lympung ïalehkai phutbol bala pynlong da ka KSU Nongpoh Circle bala ai kyrteng kum ka (L) Sabathani Lyngdoh Memorial Football Tournament 2022 kala poi noh sha kaba kut hadien ka jingïakhun phainal kaba la long mynta ka sngi hapdeng ka Umden Sport Club pyrshah ïa ka Rongmasek Sport Club ha madan ïalehkai ka shnong Saiden.
Ïa kane ka Tournament la pynlong da ka KSU Nongpoh Circle kum shi bynta ban kynmaw burom ïa une u Samla u ba lah synñiang sha ka Jaitbynriew ha ki por kiba lah leit ha kaba u la shakri ïa la ka Jaitbynriew lyngba jong ka seng KSU bad u dei ruh u dkhot ba pura jong ka KSU Nongpoh Circle u ba la khlad noh ha ka 8 Jynmang 2018.
Haba phai sha ka jingïakhun phainal ha katei ka sngi hapdeng ka Rongmesek pyrshah ïa ka Umden ka jingïakhun kala long kaba khluid bad shongshit bala wan ruh ban kyrshan da ki spah ngut ki paidbah nongpeitkai bad naduh ba sdang ka kylla step haduh ka kylla miet ym shym don ba ïoh thep satia namar ka jingtbit jong ki rangïalehkai baroh ar kynhun ha kaba na ka liang ki referee kila rai ban pynlong noh da ka jingïashut tie breaker.
Dei haka jingïashut tie breaker da ka jingtbit ki rangshut bol ka Rongmesek kala lah ban pynliem noh ïa ka Umden da 4-3 kol ban rah syndon ïa ka nam lahduh jong katei ka lympung.
Ha jingkren u Kongsan Samla Biangbor L. Paliar, u lah pynkynmaw ba u Samla Sabathani Lyngdoh u lah don bynta ha shibun ki issue ka seng naduh ka jingïakhieh ïa ka Inner Line Permit bad khamtam ban pynsangeh ïa ka lynti rel ha u snem 2017 ha u bnai Jymmang kaba lah pynlong ïa u bad bun ngut ki dkhot ka seng kin shah kem bad kiba hap shong along haduh saw bnai kynthieh. Hynrei hadien kata ruh une u samla khlem da kynran dien u lah don bynta beit bad ki issue ka seng haduh ka sngi ba un khlad noh ha ka 8 tarik Jymmang 2018.
Ïa katei ka lympung la wan ban pynhap pyrda noh da u Samla Biangbor L. Paliar Vice President ka KSU Sengkmie bad Samla Ferdynald K. Kharkamni President ka KSU North Khasi District kum u symbud kongsan ha ka jingïadonlang Adviser ka Dorbar Shnong Saiden bad rangbah shnong barim Bah EK Lapang, ki nongïalam ka District, Nongpoh Circle bad ki bahaïing hasem jong u (L) Sabathani Lyngdoh, naduh i kmie, i lok, khun bad ki bahaïing bahasem.
