Mynta ka jingïakhun semi final jong ka Veteran Cup
![](https://mawphor.com/wp-content/uploads/2022/04/Sports-750x430.jpg)
Shillong, Risaw 28: Ki saw kynhun ba dang sah ha ka lympung lehkai kiba la rangbah kaba la tip da ka Samkhamti Veteran Cup, kin sa ïakhun mynta ka sngi ban ïaknieh rung sha ka final jong kane ka lympung.
Kumban shu pynkynmaw, kane ka lympung la ïoh ban sdang naduh ka 7 tarik Risaw, 2023 bad ki kynhun baroh kiba la wan ban shimbynta ki long haduh 16 tylli. Ka jingthmu ba la pynlong ïa kane ka lympung ka long ban plie lad ïa kiba la rangbah ban ïoh pynkhihmet ryngkat bad ka phang pdeng kaba ong ‘Sports for Fitness, Football for Fitness’, bad ïa ki jingïalehkai la pynlong ha madan Urkaliar.
Ki saw kynhun ki ban ïaknieh rung final ki kynthup ïa ka Sunrisers 11, ka Meghalaya Police Football Veterans, Friends United bad ka Sumer veterans.
La pynbeit ban pynïakhun ïa kane ka semi final ha ka por 12 baje mynsngi, bad ka jingïalehkai kaba nyngkong kan long hapdeng ka Sunrisers 11 pyrshah ïa ka Meghalaya Police Football Veterans (MPFV), nangta ka jingïakhun semi final kaba ar ha ka por 2 baje nohphaisngi hapdeng ka Friends United pyrshah ïa ka Sumer veterans.