Nongpoh, Jymmang 11: Iwei I nongshong jong ka Kali Alto 800 u la duh noh ïa la ka jingim bad ki ar ngut pat ki la mynsaw jur, kaba dei hadien ka jingïatyngkhuh kali hapdeng ka Alto 800 bad kawei ka Mahindra Supro kaba la jia mynta ka janmiet ha surok Shillong By-pass ba hap ha ka Shnong Bhoirymbong.
Kane ka Alto 800 ka dei kaba don ïa u number ML 10 C – 0596 bad katei ka Mahindra Supro ka don ïa u number ML 10 C – 1643.
Katkum ka tyllong khubor ba la ioh lum, la ong ba kane ka jingjia ka la jia ka dei na ka daw ka jingpynher sted palat katei ka Alto 800 kaba la leit ban tynrah ïa katei ka Mahindra Super bad na kane ka jingjia, uwei u la duh ka jingim, bad ar ngut ki la mynsaw bad kynthup ruh ar ngut kiba ïaid lynti ki la shu mynsaw malu mala.
Ïa kine kiba la mynsaw la rah wut wut sha Bhoirymbog CHC ban ioh ïa kajingsumar katba utei uwei ba la mynsaw jur la pynban ba u la khlad noh hadien ba la poi ha katei ka jaka ai jingsumar.
Na ka liang ki Pulit ka Ri Bhoi ki dang pynlong ïa ka jingtohkit halor kane ka jingjia ban leh katkum ka kyndon jong ka aiñ.
