Jowai, Jymmang 11: Ka Kynhun ki Samla ka Balang Katholik jong ka Jowai Diocese hapoh ka lama jong ka Jowai Diocese Catholic Youth Movement (JDCYM) kaba kynthup ia ka East bad West Jaiñtia Hills District, Meghalaya ka la pynlong ïa ka Jingïaseng ïalap ha ka 8th bad 9th u Jymmang 2022 ha ka shnong Barato kaba hap ha U Krist Syiem Parish Barato West Jaiñtia Hills Meghalaya.
Ka phang pdeng jong kane ka jingïalap mynta u snem ka long, “To suhthied bad to nangsan ha U” (Kolosse 2:7). Ha ka 8 tarik la sdang ïa ka programme da ka Mass Bakhuid ha ka por 12 baje bud pat da ka jingpynher ïa ka Lama jong ka seng da u bah Recallme Biam kum u kongsan bah Romeo Lamare kum u symbud kongsan ha ka jingïadonlang da u Rev Fr John Myrboh Parish Priest ka Barato Parish, I Rev Fr Manbha Pakem Diocesan Youth Director, ki Sister lem bad ki hajar ngut ki samla kynthei bad shynrang kiba wan na kylleng ki Parish jong ka Jowai Diocese.
Hadein ka jingpynher lama, ki samla kila ïoh lad ban leit jngoh ïa ki longïing kristan kiba don ha ka shnong Barato ban ia syllok bad ban ïa duwai lang bad ki parabangeit jong ka balang ha kane ka shnong. Ha ka por janmiet pat la ïoh ban pynlong ïa ka Jingïalap bad jingmane sacrament da u Rev Fr Manbha Pakem.
Ha ka sngi ba bud kata ka 9 tarik kaba dei ka sngi u Blei, la sdang da ka Mass Bakhuid ha ka por 9 waje mynstep ha kaba u Rev Fr Ferdinand Dkhar Dio-cesan Administrator ka Jowai Diocese u long u nongkñia rang bah ha ka jingïadon lang jong kiwei pat ki lyngdoh sohblei ka balang.
La ïoh ïa ki kyntien pdiang sngewbha na u President ka seng samla Mutshwa Thabah bad la ïalam rwai da ka kynhun ki samla naka parish Mookyndeng. Hadein ka Mass Bakhuid la ïoh ban pyllait ïa ka Riti Treikam (constitution) jong ka seng ki samla ka Jowai Diocese da u Rev Fr Ferdinand Dkhar ha ka jingïadon lang kiwei pat ki lyngdoh sohblei, ka jingsakhi lang ki hajar ngut ki paid riewngeit kiba kynthup ïa ki Longkmie, ki Rangbah, ki khynnah rit bad ki khun Samla.
Ïa kane ka sengbah ki samla ka Jowai Diocese ïa kaba la jutip kyrteng kum ka Indian Catholic Youth Movement Jowai Diocese (ICYM-JD) naduh kane ka sngi 9 tarik u Jymmang, 2022 baka seng ka la ïoh ïa ka riti treikam (consti tution) ba pura ym tip bad yn khot noh da ka Jowai Diocese Catholic Youth Movement (JDCYM).
Ha ka nohphai sngi, la ïoh ïa ka jingïalap na u bah Dominic Thappa ba la hikai bad ïalap ïa ka ktien u Blei halor ka phang, “To suhthied bad to Nangsan ha U” (Kolosse 2:7) bad ïa ka jingkyrkhu na u Rev Fr Manbha Pakem DYD- JDCYM.
Ha kaba pynkut ia kane ka sngi la ïoh ïa ka jingpynhiar ïa ka lama jong ka seng da u ma Dawan Lyngdoh MDC ka Mynsngat- Khanduli Consti-tuency ha ryngkat ka jingsakhi lang ki Lyndoh Sohblei, ki nong ïalam barim jong ka seng bad ki paid riewngeit ka Katholik.
