Haduh 17 tylli ki skul kiba wan ïashim bynta ha ka ‘Inter School Athletic Meet’ ha Jowai

Jowai, Jymmang 11: Haduh 17 tylli ki skul kiba don na kylleng ka West Jaiñtia Hills District kila wan ban ïashim bynta ha ka ‘District Level Inter School Athletic Meet 2022′ ba la pynïaid da ka ophis u District Sports Officer bad West Jaiñtia District Sports Association.
Ïa kane Inter School Athletic Meet-2022 la sdang naduh mynta ka sngi 11 tarik, kan bteng lashai ka sngi 12 tarik bad pynkut ha ka 13 tarik ha madan Kiang Nangbah Stadium Dongmihsngi, Jowai.
Na ka liang u Additional Deputy Commissioner ka WJHD u P.K Boro ula wan ban plie pyrda ïa kane ka Inter School Athletic Meet-2022 mynta ka sngi ha ryngkat ka jingdonlang u DSO ma K. Passah, ka District School Education Officer kong P. Syiem, u President ka Synjuk Ki Waheh Shnong Jowai ma Alan Niangti, ki dkhot ka West Jaiñtia District Sport Association, ki khynnah skul lem bad ki nonghikai.
Ha kane ka ‘Inter School Athletic Meet-2022 na ka liang u kongsan haba ai jingkren ula ai ka jingïaroh ïa ka ophis u DSO kaba la lah ban pynlong biang ïa kane ka jingïalehkai, hadien jong ka jingwan lynngshop jong ka khlam Covid-19 ha kine ki ar snem kiba la dep.
U kyrmen ba ka jingïoh ban ïashim bynta jong ki khynnah skul ha kane ka ‘Inter School Athletic Meet’ kan long ka jingmyntoi kaba khraw eh ïa ki ha ka jingim kum ki kynnah skul ba kin nang lah lah ban pynleit jingmut ha ki kam sports. Da kaba kumtu ïa ki ban long kiba don burom bad ka akor ba bha. Ha ka juh ka por u P.K Boro ula pynher ruh ïa ka lama.
Na ka bynta ki Evens kiba la pynlong ha kane ka ‘District Level Inter School Athletic Meet 2022′ ki kynthup ïa ka jingmareh 100 Meters, 4×11 meters, 400 Meters, 600 Meters , 1500 Meters, 2000 Meters, High Jump, Long Jump, Discus throw, Javelin throw bad ka shot put.