Haduh mynta ym pat ïoh jingthoh ban lait ka Meghalaya na ka CUET

Shillong, Jymmang 10: Ki Samla pule kiba dei ban bteng ïa ka jingpule ha ki Degree Course ynda la pass ïa ka Class 12 kin dang hap ban syier mynsiem la kin hap ban ïaleh ne em ïa ka Common University Entrance Test(CUET) namar ka sorkar pdeng haduh mynta kam pat da ka jingthoh ba la pyllait ïa ka Meghalaya na kane ka eksam.
U Myntri Rangbah ka jylla, u Conrad Sangma, haba ïakren bad ki nongthohkhubor hadien ba la wai ka jingïalang jong ka kynhun Myntri mynta ka sngi, u la ong ba haduh mynta ka sorkar jylla kam pat ïoh pdiang ïa ka shithi na ka sorkar pdeng ba la pyllait ïa ki Samla pule ban ïaleh ïa kane ka eksam. Hynrei u la kren skhem ba ka sorkar pdeng lyngba u Myntri ka tnad Human Resource Development jong ka sorkar pdeng, ka sorkar pdeng ka la kren shai bad sngewthuh bha ïa ka jingeh ki College hangne, namar kiba bun kidei kiba shu pynïasoh bad ka NEHU kaba long ka Central University, hynrei kim dei kiba la seng da ka NEHU. “Nga kwah ban kren da kaba skhem ba ki samla pule ka jylla kim dei ban syier ne sheptieng ba hap ban ïaleh ïa kane ka eksam, namar ba u Myntri ka sorkar pdeng u ladep kren shai ha ka jingïakynduh bad nga ha Delhi”, la ong u Conrad.
Lah ban kdew hangne ba hadien ba ka NEHU ka la rai ban pyntreikam ïa ka CUET katkum ka jingbthah ka UGC bad ka sorkar pdeng, ka la don ka jingkhih na ki samla pule ka jylla kiba la pynpaw ka jingeh ban ïaleh ïa kane ka test. U Myntri Rangbah ka jylla, ha ka jingleit sha Delhi u la ïakren kyrpang bad u Myntri ka tnad Human Resource Development halor ka jingeh ki samla pule ka jylla bad na ka liang u Myntri u la kular ba yn pyllait ïa ki College ki bym shym la seng da ka NEHU, hynrei yn pyntreikam beit tang ha ki College ba seng da ka NEHU.
Halor ka jingbym pat ïoh ïa ka shithi ne ka jingthoh, u Conrad, u la ong ba ha India ki don da ki spah bad ki hajar tylli ki University bad kan kham shim por ba kan peit bniah, kino kiba dei ban pyllait bad kino kiba dei ban hap pdiang ban pynlong ïa kane ka test.
Lah ban kdew ruh ba ka UGC halor ka jingbthah jong ka sorkar pdeng ha kine ki bnai baladep, ka la rai ba baroh ki samla kiba pyndep ne pass ïa ka Class 12, kin hap ban ïaleh ïa ka CUET ban ïong bteng ïa ka jingpule sha ki Degree Course.