Shillong, Jymmang, 10: U President jong ka Meghalaya Pradesh Congress Committee (MPCC) u Bah Vincent H. Pala ha ka sngi Baar ula ong ba ka jingmih khubor halor ka jingthmu ban leit pynïasoh jong u MLA barim jong ka Congress na Sohiong u Bah Donkupar Roy Lyngdoh sha ka United Democratic Party (UDP) kam long kaba shisha.
“Hadien ka jingmih ha ki kotkhubor, nga la ïakren markhmat bad u Bah HDR Lyngdoh bad u la ong ba wat ngeit ïa ka khubor jong ki briew namarba u la don hapoh ka party la 30 snem un ïaineh beit ha ka Congress,” ong u Bah Pala ha ka jingiakren bad u nongthoh khubor hadien ba la wai ka jingialang ha ka shnong Nongthliew, Eastern West Khasi Hills District.
“Ka bha ba nga ngeit ïa u Bah HDR Lyngdoh ban ïa kaba nga ngeit ïa ki hamsaïa nangne nangtai,” la ong u Bah Pala.
Haba kylli halor kiwei pat ki seng saiñ pyrthei kiba don hapoh ka jylla, une u Nongïalam ka Congress ha Meghalaya ula ong, “kiwei kiwei ki party ki dukha mynsiem bha namar lada ki leit sha ki paidbah, ki paidbah kim treh, ki (kiwei pat ki party) pyrshang ban pynngeit ïa ki nongïalam jong ngi hapoh ka Congress namarba ki briew kiba don bad ngi mynta ha ka Congress namarba ngi don ha ka Liang Pyrshah ngi kham duk hynrei u briew kum u Bah HDR Lyngdoh ngam tharai ba u dei uba duk ba ki lah ban shu pynbiej kumne kumtai.”
“Kine kiei kiei baroh ki long namarba kim (kiwei pat ki Seng Sainpyrthei) kim lah ban pynngeit ïa ki briew (nongthep vote) ki pynngeit ïa ki nongïalam. Ki nongïalam jong ngi mynta ki la kham sngewthuh bad ki don kiba la babe ruh. Ban leit te ka suk bad ban ïoh biang ïa ka jingjop hadien kam dei kaba suk namarba ki kham stad ki nongthep vote shikatdei eh ban ïa ki kyrtong kiba ïakhun ilekshon,” la bynrap u Bah Pala.
“Ngi dei ban sngewthuh ïa kata, ki briew ki jied (ïa u ne ka kyrtong) ïa kiba lah ban shahniah. Ki briew ki jied lada ki ïohi ba ngi trei hok,” u la ong.
“Namarba ka Ilekshon ka dang jngai sa shisnem bad ki jingkylla ruh kin dang bun bad ka jingleit nangne shatai bad ka nangtai shane ruh ka dang jur. Ngim dei ban kyiuh ban syier khamtam ma ngi leilei ki nongïalam bad ki nongtrei ngin trei shitom ban ngin sa leit sha ki paidbah namarba ki ishu kiba bun kiba pyrshah ïa kane ka Sorkar khlem artatien ka rai u paidbah ïa ka dei kaba lahduh,” ula bynrap.
“Ka jingleit jong ki nongïalam na kawei ka party sha kawei ka party kam dei kaba kut (phainal),” u la ong.
Haba kynthoh ïa ka Sorkar MDA ba la ïalam da ka National People’s Party (NPP), u la ong, naduh ba la pynkha ia ka jylla Meghalaya kam ju don satia ka bamsap bampong, hynrei ka bamsap ha ka histori jong ka Meghalaya ka dei kane ka Sorkar ba mynta. “Ka pisa kaba ki ïoh shaei kin buh, sa tang ban thied ïano re ïano, tang ban shu pynbiej ïano re ïano hi bad dei na kata ka daw ka don jingphaloh, kiba biej bad kiba tad tam ki leit la ka leit hynrei kiba kwah ban shakri ki don beit bad ngi.”
“Ka pisa ba ïohei na surok, ka pisa kaba ki pyndik ïa ki briew ha lynti, ka pisa kaba pyndik ïa ki trok, ki pyndik ïa ki nongtrei dewiong, ki pyndik ïa ki nongtih mawshun bad ki Kontraktor mynta sa tang ki jong ki (Sorkar MDA) nadong hadong. Kato ka pisa shaei kin buh, kin hap ban thied ïano re ïano khnang ba kin nang ïohbor shuh shuh, kin thied shuh shuh, kin pyndik shuh shuh. U paidbah un sa bishar la u paidbah hi u kwah ban im beit da kane ka lynti?” la kynnoh une u nongïalam ka MPCC.
“Ïa ki nongïalam ki lah ban thied, hynrei ïa u paidbah nongthep vote kam dei kaba suk,” la ïai ban u Bah Pala.
