Ba kin lait na ki jingmlien ba sniew donkam ba ki kmie ki kpa kin hikai ïa ki khun naduh dang rit

Shillong, Jymmang 10: Ka Jaïaw Presbyterian Higher Secondary School ha ka sngi Ba-ar kala pynlong ka jingïaid paidbah ban pynsngewthuh halor ka jingma jong u drok bad ka jingïalap ban sumar khuid ïa ka mei mariang. Ïa ka jingïaid paidbah bala ïashim bynta da ki samla pule klas 12 ryngkat katne ngut kiba dang rit klas bala sdang na ka phyllaw jong ka skul bad ïaid ter ter ha Mawkhar, Motphran bad pynkut biang ha skul.
Haba ïakren bad ka principal jong ka skul ka Kong Ivareen Dkhar kala ïathuh ba ka jingpynlong jong ka skul ïa kane ka jingïaid paidbah kadei lyngba ka hukum na ki bor sorkar. Kala ïathuh ba ka jingpynlong ïa kane ka jingïaid paidbah ka long ban pynsngewthuh sha ki paidbah ba kin kiar na kaba pyndonkam ïa ki jingdih kum u duma bad kiwei kiwei kiba pynjot ïa ka jingim briew bad kaban pynjaboh ïa ka mei mariang.
Halor ka jingnang kiew kiba ngop ban dih ïa u duma bad drok ka principal kala ong kaba kongsan tam ban rat diengkhong ïa kane ka jingsniew kadei beit shwa na ïing na sem ba ki kmie ki kpa kin hikai ïa la ki jong ki khun naduh ba ki dang rit.
Shuh shuh kala ïathuh ruh ba ka skul ka pyrkhing bha ïa ki khynnah skul shwa ba kin rung ha ki kamra klas da kaba talasi ïa ki pla jong ki khynnah skul bad lada lap ïa kino kino kiba dih duma ka skul ka ju pynshitom.