Shillong, Jymmang :Ki nongshong shnong ki ba hap ban ïaid lyngba na ka surok Lad Shillong hakhmat Laitkor ka ba leit sha View Point ki pynpaw ka jingsngewkhia ka ba jur ha ka ba ïadei bad ka jingsniew palat jong ka lynti surok bad ka ba la buh jingeh shibun ïa ki nongleit nongwan.
Nalor kata ki la pynpaw ruh ba watla ka long tang katto katne ka jingjngai na sor Shillong, hynrei kane ka surok ka la khohruh khohram bad dap satang da ki thliew ki syar ha baroh shilynter jong ka surok.Kumba ka long ha baroh arliang ki surok, ki don bun ki ïing ki sem abd ruh ka ‘Woodland Nursing Institute’ bad ka lynter jong kane ka surok ka long 2.5 kilomitar, hynrei ki sngi bad ki taiew ki la nang ïaid khlem da don kano kano ka jingpynbha ne maramot.
Na ka liang u Rangbah Shnong jong kane ka thaiñ, kata ka shnong Laitkor Nongdaneng, u Bah Arun Mawrie u la ïaleh shitom ban kdew ïa ki bor ki ba dei ban peit na ka bynta ban pynbha ïa kane ka surok, hynrei haduh mynta ym shym la don ba lei ei ei.Kumta ka leit ka wan bad ka ïaid ka ïeng jong ki nongshong shnong ka dang ïai long shisha ka ba kordit khamtam ha kine ki por slap.
Nalor kane, ki don ruh sa ki trok ki ba heh jong ka tnat shipai Air Force ki ba kit jingkit ha ka jaka shipai Air Force bad kane ka la nang pynsniew dur shuh shuh ïa kane ka surok.
Kumjuh ruh na ka liang ki paidbah ka thaiñ ki la buh ka jingkyrpad hakhmat ka sorkar jylla lyngba ka tnat PWD ba kan shim khia noh ïa kane bad ban phah maramot noh kham kloi khnang ba kan pynsuk ïa ka leit ka wan.
Ha kawei pat ka bynta na ka liang ki nongshong shnong ha katei ka jaka ki la ïoh jingtip ba kat bym pat dep lut ka kam pyntrei ïa ka projek ha ka jaka Air force, ka PWD kam lah ban rai ban maramot ïa katei ka surok, bad kane ka la nang pynsyier ïa ki briew ki ba shong ba sah ha katei ka thaiñ.Kane ka long namar katba nang mih ki sngi ki thliew ki syar ha kane ka surok ki la nang bun bad nang heh bad dap tang da ha um ha ka por ba slap, bad lehse kan sa poi ka por ba ki kali rit kin ym lah shuh ban ïaid lyngba kane ka surok.
