Shillong, Jymmang 10 : U Myntri barim ka sorkar jylla ba dei ruh u MLA ka HSPDP na Sohiong, Bah Samlin Malngiang u la ong ba kam don jingeh ei ei ruh ïa u lada jia ba u MLA barim ka Sohïong Bah HDR Lyngdoh un ïakhun noh na ka tiket UDP ha ka elekshon ban wan.
Lah ban kdew hangne, bun ki dang sah ha ka umdum halor katei ka khubor ba u Bah HDR un ïakhun na ka tiket UDP namar haduh mynta ka UDP bad HSPDP ki dang don ha kajuh ka lama jong ka Regional Democratic Alliance kaba ki treilang naduh shwa ka elekshon MLA 2018.
Kumta halor kane, na ka liang u Bah Samlin haba kren bad ki lad pathai khubor u la ong ba tad haduh mynta hi kam pat don satia ka jingïakren ba ka UDP bad ka HSPDP ba kin ïaid noh la kajong ne ban bteng ïa ka jingïatrei lang ha kane ka elekshon ban wan ruh.
“Ngim pat don ka jingïalang ne ka jingkhot ban ïa kren la kadei ban ïa pynneh ne pynsangeh noh ïa ka jingïatrei lang hapdeng ka UDP bad HSPDP kumba ka long ha kane ka samoi ba mynta hapoh ka lama jong ka Regional Democratic Alliance.”
Ha kawei pat ka liang haba jubab halor ka jingpynkhreh jong u MLA barim ban ïakhun na ka UDP u Bah Samlin u la ong ba ha ka elekshon hi lada ïakhun nangno nangno ruh kam pher tangba ka shong pat ha u briew.
“Ha Sohiong ngi la ju ïohi teng ba mynshwa u Maheh HDR u ïakhun na ka HSPDP, hadien pat na ka Congress bad mynta lada u ïakhun na ka UDP ruh ka long kumjuh hi. Namar ki paidbah ki peit ïa u nongïalam bad ïa ka rukom treikam. Watla ngam pat tip la katei ka dei neem ka jingshisha hynrei ha ka elekshon hi hap ban pynkhreh bad trei shitom kumjuh la kadei ïano ïano ruh khnang ban jop biang sa shisien,” u la bynrap shuh shuh.
U Bah Samlin u ong ruh ba lehse ka jingphet noh jong u Bah HDR na ka Congress ka lah ban dei namar katei ka party ka la hiar ha baroh kawei ka ri India ne ka lah ban dei ruh na kiwei kiwei ki daw.
Ha kane ka sngi, u Bah Samlin u la ong ruh ba haduh mynta u President jong ka UDP bad President ka HSPDP kim pat ai khubor la kin ïaid noh la ka jong ka lynti la kin pynkut noh ne kin bteng biang ïa ka RDA bad haduh mynta ka dang sah ha ka umdum.
Utei u MLA u la kyntait ruh ban wad party thymmai namar ïalade u kwah ban pynleit jingmut shwa na ka bynta ki kam pynroi kiba dei na ka bynta ka jingmyntoi jong u paidbah. “Ïa ka elekshon te ngin sa peit namar ban ong lypa ba ngin ïai neh ne ngin phet nga sngew ban rai marwei kam dei satia kaba long hynrei donkam ban khot jingïalang bad ki nongkyrshan lada poi haduh uta u pud ban shim ïa ka rai.”
Ha kawei pat ka liang u Bah Samlin u la ïathuh ba ha ka jingkynduh bad u Bah Renik Lyngdoh Tongkhar ba dei u MLA ka party na Mawkyrwat bad Myntri ka tnad PHE ha ka sorkar jylla, ki la ïa kren beit tang shaphang kumno ban jop biang ym ïa kiwei kiwei pat ki kam.
U ong ruh ba na ka liang jong u Bah Renik u khlem pynpaw ei ei ba un leit ïakhun noh na ka UDP kumba la mih ki khubor.
Haba ïadei pat bad ka jingkylli la kaei kaban jia lada u Bah HDR u wan ïakhun na ka UDP bad ma u pat na ka HSPDP, u Bah Samlin u la ong ba ha ka elekshon shiteng samoi jong ka MDC, baroh ki kyrtong na ka Congress, UDP bad HSPDP ki pynieng kyrtong hynrei ha kapor ba jop pat u tam 1200 vote.
“Hynrei hadien pat wan noh ka Alliance jong ka RDA hapdeng ka UDP bad HSPDP kumta la sei kyrtong tang na ka HSPDP bad ka UDP kan ym pynieng kyrtong shuh. Hynrei ynda la jop elekshon, ha ka MDC nga tam 1200 hynrei ha ka MLA pat ba ïatrei lang bad ka UDP nga tam sa tang 622. Nga ïohi ba kane ka jingïatrei lang kadei ban don naduh ki nongtrei party ha ki constituency ym dei tang ka hukum na ki bor pynïaid jong ka party na shajrong ne high level,” u la bynrap shuh shuh.
U la ong ruh ba kam myntoi ei ei tang ha ka jingïakren jong ki president jong ki ar party katba ha ki constituency pat ka jingkyrshan kam don. “Ha ka elekshon MLA ba la dep baroh ki nongkyrshan jong ka UDP ki khlem don lut bad nga hynrei ki leit sha kiwei ki party, ki don kiba leit sha ka Congress ban kyrshan ïa u Bah HDR Lyngdoh bad ruh sha ka PDF. Kane nga ïohi ba ha jrong ki ong treilang hynre ha ki nongtrei party pat kam don satia kum kata. Ha kane ka kynti kaba mynta nga sngewthuh lada treilang ne trei la kajong ruh, u paidbah ka Sohiong u stad ban jied. Kumta ka kam kaba nga trei da kaba khuid bad kaba shai nga kyrmen ba ngan nang lah ban shakri khambha shuh shuh ha ki snem kiban dang wan,” u la ong.
Kumban shu kdew hangne, ka jingïatrei lang hapdeng ka UDP bad HSPDP ka la sdang ha ka por jong u Dr. Donkupar Roy (Bam Kwai ha Dwar u Blei) bad u Bah Ardent Basaïawmoit hapoh ka lama jong ka Regional Democratic Alliance.
