Da ka jingïakynduh lang ki samla pule u snem 2023 la pynlong ha USTM Meghalaya
![](https://mawphor.com/wp-content/uploads/2022/05/mawphor-1.jpg)
Nongpoh, Risaw 10: Kum ban lum lang ïa ki samla pule kiba wan ban pule thymmai na ka bynta jong u snem 2023 bad ruh ban wan rah ïa ka jingithuh ithaw hapdeng ki para samla, ka University of Science and Technology, Meghalaya mynta u snem ka la pynlong ïa ka jingïakynduh lang jong ki samla pule ba la tip kum ka Freshers Social meet 2023 ha katei ka University kaba don ha ka Shnong Baridua, Khanapara ha ka jylla Meghalaya.
Ïa kane ka jingïakynduh lang ki samla pule kiba wan ban pule thymmai ha ki department bapher bapher la sdang ha ka 6 tarik bad la pynkut ha ka 7 tarik u Risaw 2023.
Ha ka jingsdang jong katei ka jingïakynduh lang ki samla pule la ai jingkren pdiang da u Prof GD Sharma, Vice Chancellor ka USTM. U M Hoque, Chancellor USTM kiba la pynpaw ïa ka jingkmen ban don kum kane ka jingïakynduh lang ki samla pule bad ruh ki la ai ruh ïa ki kyntien sneng ki kyntien kraw kiba ai mynsiem ïa ki samla pule ba kin dang minot ha ki jingpule na ka bynta ka lawei ba phyrnai jong ki.
Uwei na u nongak phlim ba paw ka Assam, u Jatin Bora u la shim bynta lang ha kane ka jingïakynduh ki samla pule. La pynphuh pynphieng ruh ïa kane ka jingïakynduh lang ki samla pule da ki jingrwai, ki jingshad bad kiwei kiwei ki prokram ïakop ba la pynlong ha kitei ki ar sngi lynter ha USTM.
Haba pynkut noh ïa kane ka jingïakynduh lang ki samla pule, la pynbna ruh ba ïa ka nam Mr. Fresher-2023 jong ka USTM ka la leit sha u Veto Saviyo Resu, bad ka Miss Fresher ka leit sha ka Natalia Chetia, nalor kiwei kiwei ki khusnam jong kane ka fresher meet.
Na kane ka lymgpung ïa kynduh lang ki samla pule jong u snem 2023 la pynlong ruh ki jingïakop bapher bapher kum ka jignïatai nia, ka jingïakyntip ktien, ka jingïakop rwai, ka jingïakop shad kaba long kawei na ka rynsan ban ailad ïa ki samla ba don sap ban pynpaw pyrthei ïa ki sap ki phong ba ki don kumba la ai kyrpang da u Blei.
Kaba kham pynphuh pynphieng shuh shuh ha kane ka lympung ïa kynduh lang ki samla pule, ka dei ka jingïapyni nam ïa ki riam tynrai bapher bapher na ki jaid bynriew bapher bapher kiba la wan ban pule ha katei ka skulbah ha Baridua, Khanapara.