Nongstoin, Risaw 10: U bah Passtar Nongshillong sordar ka shnong Mawïamsyiem kawei na ki shnong ha khappud ka Meghalaya Assam, ka shnong kaba dang hap hapoh u pud u sam ka Hima Nongmynsaw Syiemship jong ka West Khasi Hills District, u la kam bad kynnoh ba ka ophis jong u Syiem ka Hima Nongmynsaw Syiemship, ka la pynduh long sordar jubor ïa u khlem ka rukom kaba dei beit bad khlem da shai.
La ong ba ka ophis jong u Syiem ka la shu kynnoh ba la don ki rangbah dong na katei ka shnong Mawïamsyiem kiba la ujor pyrshah ïa u. Pynban na ka liang jong u bah Passtar pat u la ong ba lada ka don kaba kum kata ruh, ha ka jingshisha ka ophis ka lah dei ban khot hajir ïa baroh ar liang kynthup ïa kiba ujor bad ïa u.
Hynrei na ka liang u Syiem ym shym la leh kumta, bad la shu wan poi kynsan ki briew jong ka seng BJP kaba kynthup ïa u bah Spasterlin Nongrem, u ba la ju ïakhun teng kum u kyrtong MLA na ka seng BJP na katei ka thaiñ, khlem da wan lang ki briew ka ophis hima bad la shu jied sordar thymmai.
La ong shuh shuh ba ha ka sngi ba kine ki briew ki wan, kumba 111 tylli na ki 140 ki longïing ki la ïeng pyrshah ïa ka jingleh donbor jong kita ki briew bad ki la kyrshan beit ïa u bah Passtar Nongshillong.
Haba ïadei bad katei ka phang na ka liang jong u nongthoh khubor, u la ïoh ban ïakren ruh bad u bah Johnnes Sohshang Secretary ka Hima Nongmynsaw Syiemship, u ba dei ruh u inchage ïa ki shnong Garo, ha kaba u la ong ba ka Hima ka la leh katkum ki rukom bad dei tang namar ba u bah Passtar Nongshillong u la leh pyrshah ïa ki katto katne ki kyndon ka Hima, kumta la hap ban jied thymmai noh da uwei u sordar ha katei ka shnong.
Pynban namar ka la don ka jingbym lah ban pynïaid beit ïa ka kam jied sordar la hap ban pynsangeh shuwa shipor bad la khmih noh shuwa tang da u inchage tad haduh ban da pynbeit da kumwei pat.
