Pynlong ka Mawsaw Govt. UP&RMSA SS ïa ka jingïaid paidbah ryngkat ki khynnah skul

Mawkyrwat, Jymmang 10: Ka Mawsaw Government Upper Primary bad ka RMSA Secondary School ka la pynlong ïa ka jingïaid paidbah ne rally ban pynsngewthuh paidbah ïa ka jingpynsiew jong u duma la ka long u duma ba ki shynrang ki dih ne u duma ba ki kynthei ki shu tynsad hapoh shyntur.Hadien ka jingïaid paidbah la ïoh ban pynlong ïa ka jingïalang ba lyngkot ha ïew Mawsaw ban pynsngewthuh shuh shuh halor ka jingktah u duma ha baroh ki liang.
Ha kane ka jingïalang la ïoh jingkren na u babu P Myrthong, Assistant Teacher jong ka UP School Mawsaw, na ka babu P. Snaitang, Headmistress jong ka RMSA Secondary School, kumjuh ruh na u bah D.B. Iawphniaw, Acting Sordar jong ka Shnong Mawsaw.
Kum ka dak ban pynskhem shuh shuh ïa kane ka prokram la ïoh ban pynlong ruh ïa ka jingsaiñ ne ka signature campaign ha kaba la ïa shimbynta da ki kmie ki kpa jong ki khynnah skul kiba wan kyrshan ha katei ka jingïalang bad kumjuh ruh da ka jingïasnohktilang jong ki ki khynnah skul bad ki nonghikai kaba long kum ka dak ban ïeng pyrshah ïa ka jingpyndonkam ïa u duma.