Nongstoiñ, Nailur 29: Ka jingthang pathar ïa ki khlaw ki btap ka ktah ïa ka marïang, ki sawdong sawkun, ïa baroh ki jingthaw kiba im kiba don hapoh jong ka bad ka pynjakhlïa ruh ïa ka lyer. Ka jingthang rnga pathar ka dei kawei na ki daw kaba wanrah ïa ka jingjot ïa ka mei marïang kumjuh ruh ïa ka koit ka khïah jong ki briew.
La ïoh jingtip ruh ba ki don ki briew ha ki thaiñ Mawlangsu kiba ju mlien ban leit tong dohum dohwah kiba pyndonkam da ki dawai bih, pynbthei bom bad kiwei kiwei pat ki rukom ban pynïap ïa ki dohum dohwah, tang na ka bynta ka jingkwah rhah bad ka myntoi shimet jong ki. Lada ym lah ban tehlakam halor kane, kan poi ka por ba ki dohum dohwah bad kiwei pat ki jingthaw kiba im hapoh um kin duhjait syndon.
Kumta, u District Magistrate, West Khasi Hills District Nongstoiñ, hapoh ka kyndon 144 CrPC u la pynmih ïa ka hukum ban khang pyrshah ïa ka jingthang rnga, thang khlaw bad ban khaïi rnga ha baroh kawei ka thaiñ Mawlangsu, West Khasi Hills District.
La khang pyrshah ruh ïa kino kino briew ne ki kynhun kiba ju mlien ban pynïap dusmon ïa ki dohum dohwah da ki dawai bih, pynbthei bom bad kiwei pat ki rukom, ha ki um bad ki wah kiba don ha ki thaiñ Mawlangsu West Khasi Hills District, lada lap ïa kiba ïaleh pyrshah yn sa shah pyshitom katkum ki kyndon jong ka aiñ.
Kane ka hukum kan treikam noh mardor bad kan neh beit kumne, hynrei lada don ki bym sngew ïahap halor kane ka hukum ki lah ban wan ïakynduh ïa u District Magistrate West Khasi Hills District, Nongstoiñ.
