New Delhi, Nailur 27 : Ka la don ka jingpynkhie im biang ïa ka swachhata ha India ha kine ki khyndai snem ba la leit hadien ka jingplie ïa ka prokram jingpynkhuid kaba heh tam – ka Swachh Bharat Mission. Ka jingai jinghikai bad ka jingsngew na ka bynta ban pynlong ïa ka ri kaba khuid ka dang sawa ha kylleng ka India. Ka Swachhata Pakhwada – Swachhata Hi Seva 2023 ka la kyntiew ïa ki sienjam ba ïadei bad ka swachhata ha ki jaka nongkyndong bad ki jaka sor jong ka ri. Palat 13 klur ki briew ki ladep ïasoh bad ka Jan Andolan ha kaba hapoh ka Pakhwada la rakhe naduh ka 15 tarik Nailur haduh ka 2 tarik Risaw (Swachh Bharat Diwas). Katba u Myntri Rangbah duh u la kyrpad ïa ki briew jong ka ri ha ka Mann Ki Baat ïa ka shramdaan kaba 1 kynta na ka bynta ka swachhata ha ka por 10 baje mynstep ha ka 1 tarik Risaw -Ek tareekh ek ghanta ek saath U la ong kan long ka ‘swachhanjali’ jong baroh na ka bynta u Bapu shi sngi ha shuwa ka Jayanti jong u.
Kumba ju long lyngba ka mynsiem ba shitrhem bad ka jingkmen ka janandolan ka la suh thied ha ka ri. Ki Jylla ka thaiñ shatei lam mihngi jong ka ri ki la pyni ïa ka mynsiem shitrhem bad ka jingaiti ruh kumjuh. Naduh ba la sdang ïa ka Pakhwada, ka jylla Meghalaya ka la pynlong bun ki swachhata campaign kaba la khring ïa bun ki nongshong shnong. Ka Jylla ka la sakhi ïa ka rally ai jinghikai lyngba ki khynnah skul, ki prokram jingpynkhuid ha ka jaka ba don ki bor pynlip ding, ki jaka pynïeng kali ha ki skul da ki nongpynkhuid bad ki nongtrei jong ki skul, ka jingprat ïa ki ñiut harud surok ha ka thaiñ Pinewalk da ki nongtrei ka Cantonment Board, ka jingpynkhuid ha ki jaka ïew da ki nongtrei kiba peit ïa ka jingkhuid jingsuba, ki sienjam ba ïadei bad ka jingdro dur ha ki kynroh, ka jingpynkhuid bad ai pusahra ïa ki nala ba don harud surok bad kiwei kiwei. La pynlong ïa ki health camp na ka bynta ki Safai Mitra bad kumjuh ruh ki rally ai jinghikai. Jan 1,400 ngut ki nongshong shnong ki la ïashim bynta shitrhem ha ki kam pynkhuid bapher bapher.
Ha Gangtok, Sikkim, la pynlong ïa ka jingpynkhuid da ka Municipal Corporation ha ka thaiñ Lal bazar, kaba don hajan ka ophis jong ka Project Management Unit. Ha kane ka jingpynkhuid la ïadon lang ki nongtrei jong ka Project Management Unit, DAY NULM bad ki dkhot jong ki Self Help Group, kiba la pynkhuid phar ïa ka jaka kaba don marjan bad ka lynti ïaid kjat kaba poi sha ka ïew die jhur. Ka Namchi Municipal Council ruh ka la pynlong ïa ka prokram jingpynkhuid ha ki jaka ba marjan jong ka Namchi Bazar. La pynkhuid ïa ka jaka ba kynthup ïa ka Central Park, New Extension Road, phyllaw jong ka ophis District Collector bad ka kper. La pynlong ïa ka jingpynkhuid ha ka jingïadonlang u chairman, Namchi Municipal Council, ki Councillor, MEO, ki dkhot jong ka Bazaar committee, ki SHG bad kinongtrei jong ka Namchi Municipal Council.
Ha Nagaland, la sakhi ka jingïashim bynta ki samla. Ha ka jingbteng ban noh synniang na ka bynta ka Swachh Bharat ka Wokha Town Council ka la jied ïa ki samla pule ba pynsaphriang jingtip sha ki paidbah. Ki la pynlong ïa ka street play-cum-awareness ha ka nongbah, ki samla pule ki la pyni ïa ki khubor shaphang ka swachhata. Kane ka street play kaba la ban jur halor ki kam jong ngi kiba ktah ïa ka Mei Mariang; ka jingbym bret bha ïa ki ñiut ki ñier, ka jingktah ïa ka koit ka khiah namar ka jingbym bret bha ïa ki ñiut ki ñier; ka jingeh na ka jingpyndonkam ïa ki plastic, bad ka jinglum ïa ki ñiut ki ñier bad jingpynkhuid ïa ki sawdong sawkun.
Ka Ambassa Municipal Council na Tripura ka la pynlong ïa ka cycle yatra ha ka jingrakhe ïa ka World Car Free Day bad ïa kane ka rally la ïalam da ki samla hapoh ka phang ‘Garbage Free Ambassa and Pollution Free Ambassa.’ Ka Kailashahar Muncipal council ruh ka pynlong ïa ka swachhata rally.
Ka Kumbi bad Jiribham ha Manipur ka la pynlong ïa ki prokram jingpynkhuid ïa ki jaboh jabaiñ na ka Ktem sah ki lanot, la pynlong ka jingphiah ïa ki ñiut kiba pyut bad ki bym pyut kynthup ka jinglum ïa ki jakhlia ba mih na ki kamra shet bad phiah ïa ki la ka jong, la pynkhuid ruh ïa ki nala, ki rud surok, ki paiñkhana bad kiwei kiwei, la khap pynwandur ïa ki jingthung bad la lum ïa ki ñiut ha ki kali kit ñiut na ka bynta ban pynkylla sboh. La pynlong ïa ka jingpynkhuid ha Steshon Rel Jiribam da ka Jiribam Municipal Council. La pynkhuid ïa ki jaka ïaid lynti rel, la pynkhuid ïa ki platform bad ka surok na ka main road sha ka platform.
Hapoh ka Campaign Swachhata Hi Seva kaba dang ïaid mynta, ka 33rd Battalion ITBP, Guwahati, Assam ka la pynlong ïa ka prokram jingpynkhuid. Ki Volunteer jong ka NSS na Jorhat bad Titabar ki la pynkhuid ïa ki dong ki shnong ba don marjan, Ka Mizoram nalor ki prokram jingpynkhuid jong ki paidbah, ka Akashvani Aizawl ka la ïasoh lang ha ka campaign Swachhata Hi Seva bad bam smai na ka bynta ka India kaba khuid. Ha Arunachal Pradesh la pynlong ïa ka prokram jingpynkhuid da ka 55th Battalion ITBP, ha Sela Top.
Ki Hynniew tylli ki Jylla jong ka thaiñ shatei lam mihngi ki la ïasoh bad ka Swachhata Pakhwada da ka mynsiem shitrhem bad ki la trei borbah na ka bynta ka Swachh Bharat.
