Shillong, Nailur 25: Ka Seng Voice of the People Party (VPP) kala ai da ka jingthoh sha u Bah Paul Lyngdoh, Myntri ka tnad Social Welfare halor kiba bun ki jingduna ka jingtreikam jong ka Child Protection Services, kaba dei ka ophis treikam ban peit ïa ka bha ka miat jong ki khynnah kiba shah ktah na ka jingshah thombor, ka jingshah iehnoh beiñ bad kiwei kiwei de ki jingshah lehbeiñ.
Ka Seng ha ka kyrwoh ba la phah da u General Secretary, ka long ba kane ka ophis treikam mynta ka don hapdeng ka jingkyrduh pisa na ka bynta ban pyndap ïa ka jingdonkam ki khynnah ha ki Child Care Home, kum ka bai dawai, ka bai skul bad ka bai leit bai wan jong ki.
Nangta ka Seng ka la ong ruh ba ki nongtrei kiba trei ha kane ka ophis mynta la kumba saw ne san bnai kim shym la ïoh satia ïa ka tulop jong ki.
Shuh shuh ka Seng ka ong ba ïa kine ki jingdonkam la ju pyndap ruh da ka jingïarap bad ka jingnoh synñiang ki riew shimet bad ki kynhun kynhun bapher bapher. Hynrei kaba bun hi ka jingdonkam kadei ka jingïarap pisa na ka sorkar pdeng, namar ïa kane ka bor treikam la seng lyngba ki aiñ bapher bapher jong ka sorkar pdeng. Hynrei mynta ka sorkar pdeng ka la sangeh ka jingai jingïarap bad kawei na ki daw bah ka long lehse ka jingbymbiang ka rukom treikam jong ka tnad Social Welfare kaba dei ban peit ïa kane ka ophis treikam.
Kumta na ka liang ka Seng ka kyntu ïa u Myntri ba un tuklar lem ïa kane ka jingeh kaba kane ka ophis, ki nongtrei bad ki khynnah ki ïakynduh jingeh.
