Shillong, Nailur : HKa tnat shipai BSF Meghalaya na ka 110th Battalion ha ka sngi Saitjaiñ ba la lah ka la pynlong da ka prokram aijingsumar ei shi bynta ka jingtreikam kaba thmu na ka bynta ka bha ka miat jong ki nongshong shnong kiba shong ba sah ha ki thaiñ khappud ka India bad Bangladesh hapoh Border Outpost Bholaganj ha EKHD.
ïa kane ka prokram la wan plie da u heh shipai ki BSF u Sh. Pradip Kumar, IPS, IG BSF Meghalaya ha ryngkat ka jingïadon lang u Commandant ka 110 Bn nalor ki paidbah nongshong shnong jong ka thaiñ.
Ha kane ka prokram na ka liang ki doktor na kane ka tnat shipai bad ki riew paidbah kila pynlong ka jingeksamin bad sam ei ia ki dawai dashin sha ki nongshong shnong kiba kham duna ha ka liang ka ïoh ka kot kiba dei napoh ka shnong Bholaganj, Nayabasti, Chaklabasti bad Kurikhal.
Nalor kane ka prokram aijingsumar, ki shipai BSF ki la pynlong ruh ïa ka ‘Weapon Exhibition’ ne ka jingpyni paidbah ïa ki tiar siat na ka bynta ki khynnah skul jong ka Ramakrishna Mission ha Bholaganj ha kaba la sakhi ïa ka jingangnud jong ki khynnah skul ban tip shaphang kine ki tiar ïaleh bad ïa kaba la pynshai ruh da ki dkhot jong kane ka tnat shipai.
Na ka liang ki nongïalam shnong kumjuh ki riew paidbah jong kine ki shnong ki la pynpaw ka jingkhublei ïa kane ka sienjam ba la shim da kane ka tnat shipai kaba long da shisha ka jingmyntoi kaba khraw ïa ki paidbah nongshong shnong jong kine ki thaiñ khappud.
