Shillong, Nailur 24 : Ka Balang Now Generation Outreach Revival Assembly ha ka sngi U Blei ka la pynkyntang ïa ka Ïingmane Cathedral of Praise kaba don ha Mawlai Nongkwar Block 13 Shillong
Kane kadei ruh ka sngi jong ka jingsdang ïa ka jingrakhe ïa ka jingdap 25 snem ka Balang ha u snem 2024. Ïa ka Balang Now Generation Outreach Revival Assembly la seng ha u snem 1999 da u Pastor Batkupar Dunai ryngkat bad ki saw ngut ki parabangeit. Mynta kane ka Balang ka la roi sted ha kylleng ki jaka ka ri Khasi, bad ki riewngeit ki la nang roi sha ki bun hajar hapdeng ki Khasi, Garo bad ki jaidbynriew na rithor.
La donlang ha kane ka sngi khraw naduh u MLA ka Mawlai Bah Brightstar Marbaniang nangta Bah Ardent Basaïawmoit MLA ka Nongkrem, u Rangbah Shnong ka Mawlai Nongkwar bad kiwei de ki nongkit kam shnong. La wan ban pynshongkun ïa katei ka sngi da ki bangeit na kiwei pat ki jylla ka ri India bad na shilliang duriaw.
