Aiu ka Sorkar ka la leh halor ka jingkren pynshit u nongïalam ka KSA : Ardent

Shillong, Nailur 20: U MLA jong ka Nongkrem, u Bah Ardent Miller Basaïawmoit ha ka sngi shong dorbar mynta ka sngi, u la buh ka jingkylli ïa ka sorkar Meghalaya kaei kaba ka la leh halor ka jingkren pynshit uwei u nongïalam ka Karbi Students Association (KSA), uba la ong ha ki lad pathai khubor ba ka Seng kan pynlong kum ka Manipur lada jia ba ki duh noh ïa ka jaka.
Haba wanrah ïa ka jingïakren lyngba ka Zero Hour Notice da kaba sot na ki kot khubor ïa ka jingkren u nongïalam ka KSA, u Bah Ardent u la kdew ïa kiba bun ki kyndon jong ka Indian Penal Code ïa ki jingkren pynshit kiba kum kine. “Ka jingkren u nongïalam ka KSA ka long kaba ngi dei ban shimkhia, namar ka wanrah ïa ka jingïakynad ha ki jaka khappud, khamtam lei lei haba ka jingïakynad ka la don lypa”, u la ong.
U MLA ka Seng VPP u la kdew ruh ba ka jinglong jingman ha ki khappud bad ka Karbi Anglong kam long satia ban pynmih ïa ki jingkren pynshit kiba kum kine namar kane ka lah ban wanrah ïa ka jingïakulmar kaba kaba jur.
U Myntri Rangba, u Conrad Sangma, haba jubab ïa kane, u la ong ba ka sorkar ka la shimkhia ïa kane bad ha ka por ba wan ki nongïalam na Karbi Anglong Autonomous Council(KAAC) ha Shillong ruh la ïakren ïa kane ka kam. Nangta ki bor jong ka KHADC ruh ki la ïakynduh ïa ki nongïalam ka KAAC ruh ki la ïakren kumno ban wanrah ïa ka jingïashong suk ha khapppud. Shuwa jong kane, ka la don ruh ka jingïakynduh hapdeng ki nongshongshnong, ki bor synshar District ruh kumjuh.
Na ka liang jong u ruh u la ïakren bad u Myntri Rangbah ka Assam lyngba ka lad ban ïakren pynbeit pud. U Myntri Rangbah u la ïathuh ruh ba ha u bai Risaw la kumno kumno ha ka taïew kaba ar kan don ka jingïakynduh biang halor ka jingïakren pynbeit pud bad kan sa don ruh ka jingleit jurip lang da ki Myntri Rangbah baroh arngut ha ki thaiñ Khanduli.