Kiwei ki jylla ki la pan Hospital kum ka AIIMS, ka Meghalaya pat khlem pan: Ronnie

Shillong, Nailur 20: Ka Myntri jong ka tnad ka koit ka khiah, ka Dr. Mazel Ampareen Lyngdoh, ka la ïathuh hapoh ïingdorbar Thawaiñ mynta ka sngi ba ka jylla Meghalaya kam shym la pan na ka sorkar pdeng ban kan buh lang kawei ka Hospital kaba long kum ka All India Institute of Medical Science (AIIMS) ha ka jylla.
Ka Myntri ka la ïathuh ïa kane haba jubab ïa ka jingkylli ba la wanrah da u Nongïalam ka Liang Pyrshah u Bah Ronnie V. Lyngdoh.
U Bah Ronnie haba wanrah ïa kane ka jingkylli u la pynkynmaw ba ka sorkar pdeng ha ki snem baladep, ka la pynpaw ka jingangnud ban shna ïa ki Hospital kiba long kum ka AIIMS ha ki bynta bapher bapher jong ka ri India, kynthup ïa ka thaiñ shatei lammihngi. U la ong ba ka Assam ka la ïoh ïa ka AIIMS ha Guwahati. Nangta kiwei pat ki jylla thaiñ lamihngi ruh ki la pan, wat ka Manipur kaba la don ka RIMS ruh ka la pan, hynrei balei ka Meghalaya kam shym la pan. U la ong ba ka jingdon ka Hospital kaba kum ka AIIMS kan long ka jingkyrkhu kaba khraw ha kaba ki Doktor na kylleng ka ri India ki wan, namar kumba long mynta kiba bun ki Doktor na NEIGRIHMS ki la mih lut ban leit trei ha ka AIIMS Guwahati.
Ka Myntri ka la ïathuh ba ki sorkar kiba ladep kim shym la pan ba don Hospital kum ka AIIMS, namar ka NEIGRIHMS ruh kadei ka Hospital kaba biang bha bad kam da ïapher than na kaba long ka AIIMS bad ka AIIMS ka shu long tang ka nam bad ka kyrteng. Ka la ong ruh ba ka sorkar mynta ka la ïakren bad ka sorkar pdeng ban nang pynbha shuh shuhïa ka jingtreikam ka NEIGRIHMS ha kaba yn wanrah ïa ki kor ki bor kiba ïaryngkat ka jingtreikam bad kiwei pat ki Hospital kiba pawnam jong ka ri India.
Ha kaba ïadei bad ka jingpan ïa ka AIIMS ha Shillong, ka Myntri ka la pdiang ïa ka jingaijingmut bad ka sorkar kan sa leh ïa kaba donkam.Ka Sorkar Jylla kala rai ban kyrpad ïa ka Sorkar Pdeng ba kan wanrah ïa ka All India Institute of Medical Science (AIIMS) ha Jylla Meghalaya.
Ka Myntri ka Koit ka Khiah Kong Ampareen Lyngdoh kala ong “Namar ka kyrteng AIIMs ka mut shibun kiei kiei ki nongpang naka thaiñ….(ngi la iakren ia kane ka kam) bad u Myntri Rangbah ka Jylla bad hooid ngin sa rah ïakren bad ka Sorkar Pdeng. U (CM) la pynkhreh ïa ka DO letter sha u Myntri ka Koit ka Khiah ka Sorkar India ban pyni ba ngi ruh ngin long kiba donbok lada ngin ïoh ïa kum kane ka Institute hapoh ka Jylla Meghalaya”.