Nongpoh, Nailur 12: Hadien bun ki jingkynthoh halor ka jingroi ki khyrdop khrong khajna ka KHADC haki surok bah National Highway kaba la pynkhim mynsiem shikatdei ïaki nongñiah kali ba kit ïaki mar ki mata bala kynnoh ruh ba jur ka jingkiew dor ki mar ki mata naka jingbun palat ki khyrdop khrong khajna, ki bor pynïaid District jong ka Ri-Bhoi lyngba u Executive Magistrate ryngkat ki pulit mynta ka sngi kila leit ban khang khyrdep noh ïa kawei ka khyrdop khrong khajna bala pynïeng da ka ka Khasi Hills Autonomous District Council (KHADC) harud u surok bah National Highway haka shnong Umdihar hadien ka hukum bala pynmih da u Deputy Commssioner.
Lah ban kdew, ba kane ka khyrdop khrong khajna jong ka KHADC, ka dang ïeng dang ha u bnai Nailar hadien ka jingrakhe ïaka sngi laitluid ka ri ba la kynnoh ruh ba ka dei kaba la shu pynieng beaiñ ban lum khajna na ki kali kit mar bapher bapher khamtam ki kali ba ñiah da ki bar jylla bad halor katei ka jingroi ki khyrdop khrong khajna ha Ri-Bhoi naka liang ki kynhun bapher bapher naduh ki trai bad nongñiah trok, ki sengbhalang kila pynpaw ka jingsngewkhia kaba jur halor ka jingmih kawei ka khyrdop ka KHADC haka shnong Umdihar bad ujor ruh sha u CEM ban shimkhia wat ban khang khyrdep noh ïaka namar ka jingmad jingeh jong ki nongñiah trok ba ki hap ban siew pisa ha katei ka khyrdop.
Dei mynta ka sngi naka liang u Majistor ryngkat ki bor pulit jong ka District kila shimkhia ban leit khang khyrdep syndon ïa katei ka khyrdop kaba don ha Umdihar hadien ka hukum bala pynmih da u Deputy Commissioner ka Ri-Bhoi District ba katei ka khyrdop kan nym treikam shuh ha katei ka jaka.
