Ka don ka jingleh shilliang kaba jur bha hapoh ka Party ther u bah Hek ïa la u jong u President

Shillong, Nailur 06 : U MLA ka BJP na Pynthor, ba die ruh u Myntri ha ka sorkar jylla Bah AL Hek u la ong ba kadei ka jingshisha ba u state President jong ka BJP, Bah Ernest Mawrie u treikam da kaba peit shilliang kumba kynnoh u Bah HM Shangpliang ha ka shithi iehnoh kam.
Haba kren bad ki lad pathai khubor hadien ba la wai ka jingïalang, u Bah Hek u la ong ruh ba dei na katei ka daw ba ka BJP kam lah satia ban kiew ha ka jylla.
Katei ka jingkren u Bah Hek kadei hadien ba u MLA barim ka Mawsynram ba dei ruh u nongai ktien ka BJP u la resain noh na ka party da kaba kynnoh ba u President ka BJP u treikam da kaba peit shilliang khmat.
“Ka jingkren jong u Bah Shangpliang kam dei tang ka jingkren jong u, lada phi kylli na baroh ki Nongïalam jong ka BJP hapoh Meghalaya naduh Garo Hills, Ri-Bhoi, West Khasi Hills, Shillong, kan don kajuh ka kyntien hi ba ka jingeh ka dei tang na ka daw jong u President bad dei namarkata ka party kam lah ban kiew bad pynkhlaiñ ha jylla Meghalaya,” u la ong.
Shuh shuh u la ïathuh ruh ba u Bah Hek u la pyntip ba u Bah Shangpliang dang hynin ka sngi u la wan ban kynduh ïa u ban pyntip ba un mih noh na ka party da kaba ong ruh ba um lah satia ban bteng ïatrei lang bad u President ba mynta.
Shuh shuh haba kylli kaei pat ka sienjam ba ka party kan shim, u Bah Hek u la ïathuh ba ka por treikam jong u President ka la jan kut bad kumta ka party kan sa shim rai halor kane.
Ha kajuh ka por pat u President ka BJP Meghalaya, Bah Ernest Mawrie ula kynnoh kylla ba dei u MLA barim ka Mawsynram Bah Himalaya Shangpliang uba trei kam da kaba peit bahaiing namar u kwah ban thungkam ïa u para jong u hapoh ka Mawsynram Mondal.
Haba kyntait ruh ba don ki jingïashrut hapoh ka party, u Bah Ernest ula ong ba ma u, kum u President jong ka BJP Meghalaya, um lah satia ban shim rai halor kano kano ka kam namarba u hap ban bud ïa ki jingbthah jong ki Nongïalam na Delhi haba ïadei bad ka rukom treikam.
Shuh shuh u la kynnoh ruh ba utei u MLA barim u la wan khroh ruh ïa u ba un ïakhun ha ka elekshon MP kaban long ha u 2024 da kaba kyntu ba ba un kren ïa ki paralok ba treilang ban sei kyrtong monlang ha katei ka elekshon.