Ka ïing pdem sboh ka dei ban long kaba khuid bad siang dewbilat.
Nyngkong pdem ha ka um ïa u skum ba la daiñ rit haduh ba un da kjit um bha.
Shi sngi shuwa ban pdem sboh, khleh lang ia ki sboh dawai (6 kg ka sboh mluh, 7.5 kg ka sboh dpei, 7.5 kg ka sboh shyiap bad 3.8 kg u skop kew). Synreit um ban sngem, lum lang shi jaka bad tap da ka plastik khnang ba ki sboh dawai bad u skum kba ba la pynsngem lypa bad sa kynton ïa u ha ka jingker (ba la shna da ki lyntang bad dieng pynïar kumba la batai shakhmat). Kyrdem ba un skhem bad ieh ia ka kynton skum haduh 5 sngi. Ïa kane ka kynton skum dei ban pynpra bad lum biang bunsien khnang ban pynïamilai ia u skum bad ki dawai kumba la batai harum.
Sien kylla kaba nyngkong (hadien 5 sngi):- Namar ka bynta ba najrong bad kynriang ka kynton skum ka dei lyer bad tyrkhong bad kan ym lah ban kylla sboh, katba ka bynta ba hapdeng pat ka khluid kat ban pynpyut ia u skum. Kumta, donkam ban pynpra ia kane ka kynton da kaba weng noh shiphut ka bynta ba nabar. Pynpra pat sa ka bynta ba hapdeng kaba khluid khnang ba kan ioh lyer. Hadien kata sa kynton biang ia une u skum; da kaba thep hapdeng ia ka bynta ba shabar bad tap pat nabar da ka bynta ba hapdeng khnang ba u skum un ih ryntih.
Ha ka por ba kynton biang ia u skum khleh ryngkat bad ki dawai sboh (3 kg sboh mluh, 3.8 kg u skop kew bad 12 kg ka mithai lali) kiba la dep khleh lypa shi sgi shuwa ban kylla ia u skum. Lada u skum u i tyrkhong, pynsngem ia u tangba dei ban phikir ba um dei
ban jhieh.
Sien kylla kaba ar (hadien 9 sngi):- Ha ka sien kylla kaba ar, weng ia ka bynta ba shabar sawdong jong ka kynton skum (shi phut – shi phut tam) da kynther bha ia u bad buh shi jaka. Pynpra ia ka bynta ba hapdeng, kynther bha ba kan ioh lyer. Kynton biang da kaba thep ia ka bynta ba shabar hapdeng bad tap da ka bynta ba napdeng shabar bad nalor.
Sien kylla kaba lai (hadien 12 sngi):- Pynpra biang ia ka kynton skum bad kylla biang kumba la batai haneng. Ai ruh 75 kg u Gymsum ha ka por ba kynton pat ia u.
Sien kylla kaba saw(hadien 15 sngi):- Pynpra biang ia ka kynton skum (ha kane ka kynti u skum u la sdang pyut ban long sboh) ha ka juh ka rukom. Pynsngem lada u skum u i tyrkhong.
Sien kylla kaba san(hadien 18 sngi):- Kylla kum ha ka sien kylla kaba saw.
Sien kylla kaba hynriew (hadien 21 sngi):- Kylla kum ha ka sien kylla kaba san.
Sien kylla kaba hynñiew (hadien 24 sngi):- Kylla kum ha ka sien kylla kaba hynriew.
Sien kylla kaba phra (hadien 27 sngi):- Ha kane ka sien u skum kba u la iashoh bad pyut bha. Lada ka sboh ha kane ka kynti kam sma iwkhong shuh (ka jingsma jong ka ammonia) kata, ka sboh ka la long ban bet symbai. Hynrei lada shem ba ka sboh ka dang don ka jingsma, donkam ban kylla biang ia ka man la ka saw sngi. Ka jingsngem jong ka sboh ruh ka dei ban biang (lah ban sngewthuh da kaba shim shi kham ka sboh ha ka kti bad sa khem ia ka; kam dei ban jhieh bad snoh ha ki shynriah kti lane tyrkhong).
II. KABA BET LANE PYNPUR SYMBAI ÏA HA KA REP TIT BUDAM.
Thep ia ka sboh ha ki synduk dieng/ rynsan siej lane pla plastic kumba 2 inshi ei ei. Breiñ symbai halor ka sboh. Tap sboh pat halor u symbai kumba 2 inshi bad thap ryntih ia ka. Ïai leh kumne tad ynda dap shi synduk ka sboh khnang ba u symbai un ioh shong 3 haduh 5 syrtap. (Pyndonkam1 haduh 2 son u symbai ha ka shi synduk ka sboh; 3 pawa haduh 1 song u symbai shi pla plastik ka sboh). Hadien kata, tap ia ka sboh da ki kot khubor.Tynrong ia ki synduk kawei halor kawei (haduh 4-5 kyrdan) lane pla plastik halor rynsan ha ka kamra thung kaba la pynkhuid bad pynsngem lypa. Synreit ia ki kot khubor da ka um dawai formalin 2% (shi pawa ka dawai ha ka 5 litre ka um) tad kin da sngem bha. ……………………( Yn dang bteng )
