Nongstoiñ, Nailur 4: Ka FKJGP Mawshynrut Circle ha ka jingïalam u president bah Teilang Nongkseh bad u general secretary bah Evening Myrthong lem bad ki katto katne ki dkhot ka circle, ki la leit ïakynduh ïa u EE (PWD Road) halor ka jingjot ba lah palat jong ka surok naduh iew Riangdo sha Thaiem. Ha ka jingshisha katei ka surok dang shu dep shna dang tang shi snem mynta da ka scheme PMGSY, hynrei imat ka jingjot kloi ka dei namar ka jingtrei torti kaba lah palat da u Contractor.
Ha katei ka jingïakren bad u Executive Engineer, u la kular ban leh ïa kaba donkam kata ba un pynbor ïa u contractor ba u dei ban repair bad ban pynkhuid ïa ki ñiut harud shilynter katei ka surok, namar ba katei ka surok ka dang dei ban sumar ne pynbiang da u contractor hapoh san snem.
Kane ka surok ka dei kaba pynïasoh ïa ka iew Riangdo bad ki shnong kiba bun sha ka thaiñ Mawthengkut haduh Thaiem kaba don kumba 7 kilometer ei ei. Hynrei, kumba ka long mynta ka la ktah haduh katta ïa ka leit ka wan ki paidbah jong ka thaiñ Mawshynrut.
