Ban phah pahara da ki pulit ha Ïew Mawkyrwat, leit kynduh DC bad DSP ka FKJGP Mawkyrwat Circle

Mawkyrwat, ‘Nailar 31: Ka Federation of Khasi Jaiñtia Garo People’s (FKJGP) Mawkyrwat Circle da ka jingsngewkhia halor ka jingnang kharoi ki kam sniew khamtam Ïew Mawkyrwat hynnin ka sngi ki la leit ban ïa kynduh markhmat ïa u Deputy Commissioner bad Superintendent jong ki Pulit ka South West Khasi Hills District ban kyrpad ban buh phah pahara da ki pulit ha Ïew Mawkyrwat.
Ïa kane ka jingleit ïa kynduh la ïalam da u bah K.L. Nonglait, President bad u bah Enbor Syiemiong, General Secretary jong ka Federation of Khasi Jaiñtia bad Garo Peoples (FKJGP) bad kanr ka jingleit ïa kynduh ka long halor ka jingsngewkhia na ka jingjyllei ki kam tuh kam thiem bad shah lute hapoh kane ka thaiñ Mawkyrwat.
Hadien ka jingleit ïa kynduh, ki la pynshai ha ki lad phathai ba ka jingleit ïa kynduh jong ki ïa ka u Deputy Commissioner bad ïa ka tnad pulit ka long ban kyntu ba kim shimkhia lem halor kane ka bynta bad ban peit ngor khnang ba kan long ka jingshngaiñ ïa ki paidbah. Ha ka juh ka por ki kyntu ruh ïa ka District Administration ban phah pahara da ki pulit hapoh Ïew Mawkyrwat ha ki por mit khnang khnang ba ka ïaid ka ïeng jong ki paidbah kan long shngaiñ.
Haba phai pat haba ïa kynduh ïa u Deputy Commissioner ki la pynpaw ka jingsngewdiaw namar ba na ka liang u DC ym shem la ïa kren halor kane wat la na ka liang ka seng ka kwah ban ïa kren ban ïatai katkum ka shithi ba ka seng ka la ai ha u, namarkata, ka seng ka sngewdiaw halor kane ka bynta, ong u bah Endor Syiemiong.