Sha u SP ujor ka KSU Narpuh halor ka jingbom lathi ki pulit ïa ki kynthei khynnah

Khliehriat Nailar 30: Ka Khasi Students’ Union (KSU) Narpuh Circle mynta ka sngi ka la ujor da ka ejahar sha u Superintendent of Police ka East Jaiñtia Hills District pyrshah ïa u Addl SP, u Dy SP bad ki pulit kiba donkti ha kaba bom lathi wat ïa ki kynthei khynnah ha ka jingjia kaba la jia ha ka 24 tarik mynta u bnai ha ka shnong Thangskai, kata ha ka por ba pynlong ïa ka public hearing ha Thangskai.
Na ka liang ka Seng ka la leit ban buh ïa kane ka jingujor hapoh ka jingïalam jong u bah KS Suchiang, uba dei u President KSU Narpuh Circle ryngkat ki dkhot lem bad katto katne ki nongïalam na ka District unit ha kaba ki la dawa ba dei ban pynshitom ïa baroh ki pulit kiba donkti ha kaba bom lathi naphang ïa ki paidbah kynthup ïa ki kynthei khynnah ha ka por ba pynlong ïa ka public hearing jong ka Meghalaya Cement Ltd, ha Thangskai EJHD ha katei ka sngi.
Ka Seng ka pynkynmaw ruh ba ha katei ka jingjia kaba la jia ha katei ka sngi na ka liang ki bor pulit ki la shoh bad kawang lathi khlem jingmap wat ia ki kynthei khynnah, kata hadien ka jingkynshoit bad pynshit da ki arngut ki nongtrei jong ka kompeni Topcem kumba la sakhi ruh lyngba ki video kiba la saphriang ha ki social media.
Nalor kata ka Seng ka la ong ruh ba kam lah ban pdiang halor ka video kaba la saphriang ha kaba la ïohi bad uwei u briew u la shah thombor ha ka kynhun ki pulit kiba don kumba 10 haduh 15 ngut hapoh ka jingïalam jong u Addl SP ka EJHD.
Shuh shuh na ka liang ka Seng lyngba une u kyrwoh ka la pynpaw ruh ba katkum ka hok longbriew manbriew ym lah satia ban pdiang ïa kane ka jingleh riewkhlaw da ki briew jong ka aiñ.Ha kajuh ka por ka dawa ruh ba dei ban pynshitom ïa baroh kito kiba donkti ha katei ka kam pyntriem khlem kano kano ka jingshah liang.