Shillong, Nailar 27: Ki lai tylli ki jingïakhun jong ka lympung ïalehkai U-20 4th DIVISION Football League 2023 ba la pynïaid da ka Shillong Sports Association, kaba hynnin ka Sngi Saitjaiñ jong ka taïew ba ladep ka la kut ha kaba ki la don lai kynhun ba khur ïa ka namjop. Kine ki kynhun kiba la khur ïa ka namjop ki kynthup ïa ka Mawkasiang SC, Nongkolew SC & Lamlynti FC (Madanlyngkhi).
ïa kine ki jingïakhun la pynlong ha madan 3rd Ground MFA Turf, Polo, haba phai sha ka jingïalehkai kaba nyngkong kaba la sdang ha ka por 3 baje nohphaisngi hapdeng ka Mawphlang SC pyrshah ïa ka Mawkasiang SC ka la jam sha kaba kut ha kaba ka Mawkasiang SC ka la ïoh ban khur ïa ka namjop salit da shi kol.
ka Mawkasiang SC ka la ïoh ban thep ïa ka kol tang mar ïa sdang ka jingïakhun, kata ha ka minit kaba 9 jong ka kylla step lyngba u Donald Roy Suting bad haduh kaba kut ka la lah ban ïada bad khlem shah thep ban khur shalade ïa ka namjop.
Hadien kane ka jingïakhun kaba nyngkong ka la kut la ïoh ban pyntyllun biang sa ïa ka jingïakhun kaba ar ha ka por 4:45 jan miet hapdeng ka Nongkolew SC pyrshah ïa ka Mawreng SC.
Ka jingïakhun jong kine ki arliang mamla ka la long kaba ïakhaid hynrei dei ka Nongkolew SC kaba la ïoh ban thep tam da 2-1 kol ban khur ïa ka namjop.
ïa ka namtam ha kane ka jingïakhun la khur da u player ka Nongkolew SC, u Ebormi Suting u ba la ïoh ban khyrwit ïa ki ar kol na ka bynta ka kynhun ha ka minit ba 11 bad 49.
Na ka bynta ka Mawreng SC, ka shi kol la thep da u Banshailang Kurbah ha ka 50 minit jong ka kylla kaba ar.
Haba phai pat sha ka jingïalehkai kaba khadduh jong katei ka sngi, la ïoh ban sdang ha ka por 6:15 janmiet, kata hapdeng ka Umsohsun SC pyrshah ïa ka Lamlynti FC (Madanlyngkhi).
Ha kane ka jingïalehkai pat, ka Lamlynti FC (Madanlyngkhi) ka la khur ïa ka namjop kaba suk da kaba pynjemkhnap bad thep haduh 4 kol, katba ka Umsohsun SC ka la ïoh ban pynphai tang shi kol.
ïa ka shi kol na ka bynta ka Umsohsun SC la thep da u Jeryson Nongspung ha ka minit kaba 70.
U Riboklang Kharbuki u la ïoh ban thep haduh ar kol na ka bynta ka kynhun, kata ha ka minit ba 26 bad 70. U Batskhem Thongnirit- u la thep shi kol ha ka 50 minit nangta na u Pyrkhat Janai Kharkongor ha ka 58 minit kaba la ïarap ïa ka Lamlynti FC (Madanlyngkhi) ban jop suk da saw kol.
